Azərbaycan Xalq Cəbhəsi Partiyasının (AXCP) gənc üzvünün həbs edildiyi bildirilir. Azadlıq Radiosunun məlumatına görə, partiyanın Nizami rayon şöbəsinin fəalı Rahib Səlimov dünən, mayın 22-də həbs edilib. Məlumatda deyilir ki, fəal 25 sutka inzibati həbsə məhkum edilib. Nizami Rayon Məhkəməsi onu İnzibati Xətalar Məcəlləsinin 535.1 (polisin qanunu tələbinə tabe olmamaq) maddəsi ilə günahkar bilib.
AXCP-nin məlumatında vurğulanır ki, mayın 22-də səhər saatlarında əvvəlcə cəbhəçi fəalın atası, sürücü işləyən Ədalət Səlimov saxlanaraq Nizami Rayon Polis İdarəsinə gətirilib. Ondan oğluna zəng edərək polis şöbəsinə gəlməsinin tələb olunduğu qeyd edilir. Bundan sonra o, Nizami Rayon Polis İdarəsinə gedib. R.Səlimovun polisə getdikdən sonra atasının sərbəst buraxıldığı, özünün isə məhkəməyə aparıldığı vurğulanır.
