“Azərbaycanı sevməyən qüvvələr öz məqsədlərini AXCP və “Milli Şura” vasitəsilə həyata keçirməyə çalışırlar”.
Bunu Trend-ə Yeni Azərbaycan Partiyası (YAP) icra katibinin müavini Siyavuş Novruzov deyib.
“Hər kəsə bəllidir ki, AXCP və “Milli Şura”nın məqsədi anti-Azərbaycan mövqeyində dayanmaq və xaricdən aldıqları maliyyə hesabına daxildəki ictimai-siyasi sabitliyi pozmaq, Azərbaycan haqqında ayrı-ayrı beynəlxalq təşkilatlara və s. yalan məlumat ötürməkdir”.
YAP-ın icra katibi deyib ki, Azərbaycanın uğurlu xarici və daxili siyasətini istəməyən xarici qüvvələr ölkədə təxribatlar törətmək və ictimai-siyasi sabitliyi pozmağa cəhd etmək üçün müxtəlif şəxslər vasitəsilə Azərbaycana maliyyə vəsaitini AXCP və “Milli Şura”ya ötürür.
S. Novruzov bir neçə gün əvvəl DİN və Baş Prokurorluğun yaydığı məlumatla bağlı da danışıb.
“Milyonlarla pul qazanırlar, lakin bu məsələlər hətta öz yaxın ətraflarından belə gizlədilir və saxta hesabatlar verilir. İstintaq bu məsələ ilə bağlı iş aparır, son qərar istintaqdan asılı olacaq”.
26 mayda DİN və Baş Prokurorluq AXCP funksionerlərini qanunsuz sahibkarlıqda ittiham edib. Yayılan birgə Məluamtda deyilir ki, adıçəkilən qurumlar ölkənin iqtisadi maraqlarına qarşı yönəlməklə sahibkarlıq fəaliyyətinin qanunla müəyyən edilmiş qaydalarına qəsd edən cinayətlərin aşkarlanaraq qarşısının alınması istiqamətində istintaq-əməliyyat tədbirləri keçirib.
AXCP-nin 3 fəalı saxlanılıb və barələrində 4 aylıq həbs qətimkan tədbiri seçilib.
AXCP funksionerləri və mayın əvvəlində həbs edilən Gədəbəy rayonunun keçmiş icra başçısı Saleh Rüstəmli çirkli pul vəsaitlərini leqallaşdırmaqda ittiham olunurlar. Açıqlamada S.Rüstəmlinin Rusiyadan AXCP-yə pul göndərdiyi, həbs edilən cəbhəçilərin həmin vəsaitləri alıb partiya rəhbərinə çatdırdıqları bildirilir. İddialarda söhbət ümumilikdə 412 min dollardan gedir.
