Bakı Şəhər İcra Hakimiyyəti sahibsiz küçə itləriylə bağlı sərəncam verib. Sərəncama əsasən, Bakının Xəzər rayonu, Qala qəsəbəsində itlər üçün 30 sot torpaq sahəsi ayrılıb.
Bu barədə məlumatı Mərdəkanda şəxsi bağ sahəsində 300-ə qədər it saxlayan Eldar Mansurov noyabrın 8-də Xəzər Rayon Məhkəməsində verib.
Nə baş verib: Məhkəmə prosesi Xəzər Rayon İcra Hakimiyyətinin başçısı Gülağa İslamovun iddiası üzrə başlayıb. Bakı Şəhər İcra Hakimiyyəti də üçüncü tərəf qismində cəlb olunub. İcra başçısı keçmiş polis zabiti olan E.Mansurovun həyətində saxlanılan itlərin oradan köçürülməsini, özünün də ev heyvanı saxlamaq hüququndan məhrum edilməsini istəyir.
Eldar Mansurov isə məhkəmədən vaxt istəyib ki, meriyanın ayırdığı torpaq sahəsinə baxış keçirilsin, orada itlərin saxlanması, gediş-gəliş üçün şərait olub-olmadığı müəyyənləşdirilsin. Bundan sonra fikirlərini bildirəcəklər.
E.Mansurov onu da deyib ki, Bakı Şəhər İcra Hakimiyyəti itlərlə bağlı sərəncamı daxili işlər naziri Ramil Usubovun müraciətindən sonra verib.
Məhkəmə tərəflərə bir ay vaxt verib ki, həm torpaq sahəsinə baxış keçirilsin, həm də öz aralarında razılığa gəlsinlər.
