Əli Həsənov. Foto: şəxsi arxiv / facebook

“Qanunla qadağan olunmasına və müvafiq xəbərdarlığa baxmayaraq, AXCP rəhbərliyi və fəallarının təşkilatçılığı və bilavasitə iştirakı ilə bir qrup fəal Şəhidlər xiyabanı ərazisinə keçməyə və siyasi aksiya keçirməyə cəhd göstərib”.

Bunu Trend-ə Prezidentinin ictimai-siyasi məsələlər üzrə köməkçisi Əli Həsənov deyib.

Prezidentin köməkçisi iddia edib ki, fəallar polis işçilərinə müqavimət göstəriblər. Bundan sonra isə saxlanılanlar olub və Səbail Rayon Polis İdarəsinə aparılıb.

“Təəssüflə bildirmək istərdim ki, bəzi yerli və xarici KİV-lərdə, o cümlədən sosial şəbəkələrdə məsələ ilə bağlı dəqiqləşdirilməmiş, qeyri-obyektiv və birtərəfli məlumat yayılıb, məsələ yanlış şəkildə insan hüquq və azadlıqlarının, o cümlədən sərbəst toplaşmaq, söz və məlumat azadlığının, fikir plüralizminin məhdudlaşdırılması kimi qələmə verilib”.

Əli Həsənov bildirib ki, hüquq-mühafizə orqanları qanunun tələblərinə uyğun olaraq qeyri-qanuni aksiyanın qarşısını alıb və bunun insan hüquq və azadlıqlarının pozulması ilə heç bir əlaqəsi yoxdur.

“Polis üçün əsas meyar siyasi mənsubiyyət məsələsi deyil, ictimai asayişin təmin edilməsidir”.

Nə baş verib: Dünən Milli Dirçəliş gününü qeyd etmək məqsədi ilə AXCP və Milli Şura üzvləri Şəhidlər Xiyabanına yürüş etmək istəyib. Polis mane olub və Cəmil Həsənli, Əli Kərimli başda olmaqla 53 fəalı Səbail rayon Polis İdarəsinə aparıb.

11 nəfərin ittihamı nələrdir: Saxlanılan 11 nəfər İnzibati Xətalar Məcəlləsinin 513.2-ci (“Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydada təşkil edilməyən yığıncaq, mitinq, nümayiş, küçə yürüşü və ya piketdə iştirak etməyə görə) maddəsi ilə ittiham olunub.

Əli Kərimli hansı maddələrlə ittiham edilir: AXCP sədri Əli Kərimli iki maddə ilə; 513.2-ci və 513.1-ci ( Yığıncaqların, mitinqlərin, nümayişlərin, küçə yürüşlərinin və piketlərin təşkilinin və keçirilməsinin “Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydasının toplantının təşkilatçısı tərəfindən pozulmasına görə) ittiham edilir.

  • Bu maddələr üzrə ittiham olunan şəxslərin təqsiri məhkəmədə sübuta yetirilərsə, onları pul cəzası, ictimai işlərə cəlb etmə və ya 2 ay müddətinə inzibati həbs cəzası gözləyir.

  • Dünən gecə saatlarında Cəmil Həsənli və saxlanılan fəalların bir qismi azadlığa buraxılıb.

  • AXCP fəallarından Ruslan Qurbanlı 1000 AZN məbləğində cərimə olunub. O, saxlanılan zaman böyrəyindən zədə alıb və polislər onu səkiyə yıxaraq təpikləyib.

Şərhini yaz

Şərhinizi yazın
Adınızı daxil edin