Qlobal istiləşmənin ən çox təsir etdiyi ərazilərdən olan Himalay dağları ilə bağlı 350 tədqiqatçının iştirakı ilə hazırlanan “The Hindu Kush Himalaya Assessment”in nəticələri açıqlanıb.
Euronews yazır ki, qlobal istiləşmənin indiki sürətlə davam etdiyi təqdirdə əsrin sonunda dağlıq ərazidəki temperaturun 4 dərəcə artacağı bildirilir. Bu halda Everest də daxil olmaqla dağlardakı buzlaqların böyük hissəsi əriyəcək.
Buzlaqların əriməsi təkcə dağlıq ərazidə yaşayan 200 milyon insan üçün yox, həm də buradan qidalanan su hövzələrinə yaxın yaşayan 1.6 milyarddan çox əhali üçün təhlükəlidir. Yəni, söhbət ümumilikdə, 2 milyarda yaxın insanın həyatından gedir.
Üstəlik, buzlaqlar əridikdən sonra su qaynaqları azalacaq, bu da əkinçilik və heyvandarlığa birbaşa mənfi təsir edəcək. Beləliklə, dünya bəlkə də tarixin ən böyük qıtlıq dövrü ilə üzləşəcək.
2016-cı ildə planetdə temperaturun 1,5 dərəcədən artıq artmaması üçün Paris İqlim Sazişi imzalansa da elm adamları bildirirlər ki, buna nail olsaq belə, dağlardakı buzlaqların əriməsinin qarşısını almaq mümkün deyil.
Qlobal istiləşmənin nəticələri artıq dünyanın bir çox bölgəsində öz təsirini göstərir. Ən çox zərər çəkən isə Hindistandır. Burada ölkə əhalisinin yarısı – yəni, 600 milyon nəfər təmiz su tapmaqda çətinlik çəkir. Bu səbəblə də hər il 200 min nəfər həyatını itirir.
