İsti havaya tab gətirə bilməyən parislilər sərinləmək üçün hovuzlarla yanaşı, fəvvarələrə də axın edirlər. Foto: Getty images

Bu il dünyada indiyə qədərki ən isti yay fəsli müşahidə olunur. BBC yazır ki, bu da ən çox Avropa ölkələrinə təsir göstərir.

Bir neçə gün əvvəl Fransa, Almaniya, Polşa və Çexiyada iyun ayı üçün rekord temperatur (39 dərəcəyə yaxın) qeydə alınıb. Bu gündən etibarən temperaturun daha da yüksələcəyi və cümə günü 40 dərəcəni keçəcəyi proqnozlaşdırılır.

Fransada xalqa isti havadan qorunmaq barədə xəbərdarlıq edilib. Ölkədə əhəmiyyətinə görə ikinci dərəcəli hesab olunan “narıncı” təhlükə elan edilib.

Fransada rekord istilər (44,1 dərəcə) sonuncu dəfə 2003-cü ilin yayında qeydə alınıb və 15 min insan istidən ölüb. Həmin il Avropada istidən ölənlərin ümumi sayı 70 min nəfərə çatıb.

Hazırda İsveçrə və İspaniya da isti hava dalğasının təsiri altındadır. İspaniyada cümə günü temperaturun 45 dərəcəyə çatması gözlənilir. Hökumət meşə yanğınlarının çoxalmasından ehtiyat edir.

Bildirilir ki, Alp dağlarında belə 30 dərəcə istilik müşahidə olunur.

Meteoroloqlar isti hava dalğasının Şimali Afrikadan gəldiyini deyirlər. Onların fikrincə bu cür təbiət hadisələri təbii olaraq baş verir, amma iqlim dəyişikliyinə görə bu hal əvvəlki əsrlərlə müqayisədə daha tez-tez müşahidə olunacaq.

Statistika göstərir ki, Yer səthinin orta temperaturu sənayeləşmədən sonra 1 dərəcə artıb.

Almaniyada yerləşən iqlim araşdırmaları institutu isə bildirir ki, Avropada 1500-ci ildən bəri ən isti 5 yay məhz 21-ci əsrdə müşahidə olunub.

  • İyunun 24-də paytaxt Bakı daxil olmaqla, Azərbaycanın bəzi şəhərlərində indiyə kimi iyun ayı üçün ən yüksək temperatur olan 37 dərəcə qeydə alınıb.