İnterpolun rəsmi saytından screenshot
“Lanset” klinikasının həmtəsisçisi, Gürcüstanda həbsdə olan cərrah Fərman Ceyranlı İnterpol xətti ilə beynəlxalq axtarışa verilib.
Onun vəkili Gela Nikolaishvili Mikroskop-a deyib ki, cərrahın həbs müddəti avqustun 20-də bitir və bundan sonra o, Azərbaycana təhvil verilə bilər.
Bizdə hələ ki, Azərbaycan tərəfinin Fərman Ceyranlının ekstradisiyasını tələb etməsi barədə rəsmi sənəd yoxdur, amma onun hər iki ölkədə vətəndaşlığı var. Bu gün F.Ceyranlının Ali Məhkəmədə işinə baxılıb və məhkəmənin qərarı hələ açıqlanmayıb. Biz vəsatət qaldırmışıq ki, ona bəraət verilsin, prokurorluq isə tələb edir ki, cərrah barədə dələduzluq ittihamı qüvvədə qalsın.
Vəkilin sözlərinə görə, F.Ceyranlı ilə bağlı yekun qərarın nə olacağı məlum deyil, amma Gürcüstan qanunvericiliyi də öz vətəndaşının başqa ölkəyə ekstradisiyasına icazə vermir.
Azərbaycan hüquq-mühafizə orqanları nə deyir: Azərbaycan DİN-in İnsan Alverinə qarşı Mübarizə Baş İdarəsi F. Ceyranlını beynəlxalq axtarışa verib. Onun barəsində Azərbaycan Cinayət Məcəlləsinin insan alveri maddəsi ilə 2019-cu ildə axtarış elan edilib.
Nə baş verib: 2017-ci ilin may ayında F. Ceyranlı Gürcüstanda saxlanılıb. Onun saxlanmasına səbəb kimi həmtəsisçisi olduğu klinikada qanunsuz orqan köçürməsi əməliyyatı edildiyi və bu zaman iki nəfərin öldüyü əsas göstərilib. F. Ceyranlı Gürcüstan Cinayət Məcəlləsinin 180-ci (dələduzluq) maddəsi ilə ittiham olunub. 2018-ci ilin fevral ayında məhkəmənin qərarı ilə F. Ceyranlı 6 il müddətinə azadlıqdan məhrum olunub. 2018-ci ilin dekabr ayında isə Gürcüstan Apelyasiya Məhkəməsinin qərarı ilə F. Ceyranlı barəsində 6 il azadlıqdan məhrumetmə cəzası 2 il 3 ayadək azaldılıb. Onun 2 il 3 aylıq cəzası bu ilin avqust ayında başa çatır.
