Bu gün Bakı və ətraf ərazilərdə əsən güclü külək nəticəsində bir çox yerdə ağaclar aşıb, şəxsi avtomobillərə ziyan görüb və bəzi yerlərdə elektrik enerjisinin verilməsində problemlər yaranıb. Külək şəhərdə hansı fəsadları törədib?
- Sumqayıt şəhərinin 3-cü mikrorayon ərazisində yerləşən 12-mərtəbəli binanın fasadının bəzi hissələrini və dam örtüyünü uçurub. Xəsarət alan olmayıb.
- Bakı Nəqliyyat Agentliyi şəhər sakinlərini ehtiyatlı olmağa, dayanacaqda avtobus gözləyərkən və avtobusa minib düşərkən diqqətli olmağa çağırıb.
- Xırdalan sakinləri AzadlıqRadiosuna bildirib ki, bəzi evlərin damına, həyət evlərində balkonlara ziyan dəyib.
- Sumqayıt şəhərinin 3-cü mikrorayonunda binanın qarşısından keçən qadının başına dam örtüyündən qopan şifer parçası düşüb. Xəsarət alan 57 yaşlı qadın xəstəxanaya yerləşdirilib.
- Sumqayıtda daha bir ağac budağı şəhərin 12-ci mikrorayonunda 10 yaşlı qızın başına düşüb. Qapalı kəllə-beyin travması aldığı bildirilən qız xəstəxananın reanimasiya şöbəsinə yerləşdirilib.
- Yasamal rayonunda qırılan ağac bankomata ziyan vurub. Hadisə nəticəsində xəsarət alan olmayıb.
- Şəhərin bir çox yerində ağaclar aşıb, bir çox ağacən isə budağı qırılıb. Budaqlardan biri Səbail rayonunda 20 yaşlı qızın üstünə düşüb. Kliniki Tibbi Mərkəzə yerləşdirilən qızın vəziyyətinin orta ağır olduğu bildirilir.
- Bakının bir sıra ərazilərindən və paytaxtətrafı bəzi qəsəbələrdən verilən məlumata görə, onlarda elektrik enerjisi kəsilib. Xırdalan şəhəri, Zirə qəsəbəsi və başqa yaşayış məntəqələrində işıqlar kəsilib.
- “Azərişıq” Açıq Səhmdar Cəmiyyətinin (ASC) Məlumat Mərkəzindən isə məsələ ilə bağlı bildiriblər ki, Bakının və Abşeronun bəzi yerlərində elektrikin kəsilməsi əsən güclü küləyin fəsadlarıdır. Mərkəzdən vurğulanıb ki, güclü küləyə görə, bəzi yerlərdə elektrik xətləri bir-birinin üstünə düşüb və qısa qapanma yaranıb, bunun nəticəsində işıqlar sönüb.
- Külək əhalinin təbii qazla təminatına da maneə yaradıb. Bakının Nəsimi rayonunda güclü gülək ağacı qaz xəttinin üzərinə aşırıb. “Azəriqaz”dan verilən məlumata görə, Nəsimi rayonu, Dilarə Əliyeva küçəsində 243 və 249 saylı binaları təbii qazla təmin edən aşağıtəzyiqli qaz xətti ağac aşması nəticəsində zədələnib. 500 abonentin qaz təminatında məhdudiyyət yaranıb.
