Donald Tramp. Foto: Kevin Dietsch / EPA

ABŞ prezidenti Donald Tramp Ağ Evdə jurnalistlərə açıqlamasında Çinin Co Baydenin oğlu haqqında araşdırma aparmalı olduğunu deyib. Deutsche Welle yazır ki, prezident bu məqsədlə Çin prezidenti Si Cinpinqlə danışmadığını, amma mütləq bu barədə düşünəcəyini bildirib.

Nümayəndələr Palatasının Demokratlardan olan sədri Nensi Pelosi prezidentin açıqlamasını tənqid edib və deyib ki, Trampın xarici ölkələrin köməyi ilə seçkilərdə qalib gəlməyə çalışmağı düzgün deyil.

Nə baş verib: ABŞ prezidenti Donald Tramp telefon söhbəti zamanı Ukrayna prezidenti Vladimir Zelenskidən siyasi rəqibi Co Baydenin oğlu Hanter Baydeni araşdırmağı xahiş edib. Prezidentin bu xahişi vəzifə səlahiyyətlərindən sui-istifadə kimi qiymətləndirilib və onun haqqında impiçment proseduru başladılıb.