Mərkəzi Seçki Komissiyası seçkilərin hazırlanması və keçirilməsi ilə bağlı Təqvim Planını açıqlayıb. Rəsmi mətbuatın dərc etdiyi təqvim planına görə, prezidentliyə namizədlərin rəsmi olaraq irəli sürülməsi seçkilərin təyin edilməsi haqda qərarın dərc edildiyi gündən başlanır. Namizədlər lazımi sənədləri təqdim etdikdən sonra 5 gün ərzində onların namizədliyinin qeydə alınıb-alınmaması ilə bağlı qərar qəbul edilir.
Qeydiyyatdan keçmiş namizədlər 40 min seçici imzası olan vərəqləri fevralın 20-dən 12 mart 18:00-a qədər MSK-ya təqdim edə bilər. Sənədlərlə birlikdə qəbul edilən imza vərəqələri 7 gün ərzində yoxlanılır.
Namizədlərin seçkiqabağı təşviqat kampaniyası isə martın 19-dan etibarən başlayacaq və 10 aprel saat 8:00-a qədər davam edəcək.
Seçkilər günü “Exit-poll” sorğuları keçirmək istəyən təşkilatlar martın 22-nə qədər MSK-ya müraciət etməlidirlər.
Akkreditasiya haqqında qərarlar aprelin 1-nə qədər qəbul ediləcək.
Seçkilər günü səsvermə 08.00-da başlayacaq və 19.00-da başa çatacaq.
Saat 10.00-da, 12.00-da,15.00-da, 17.00-da və 19.00-da səsvermədə iştirak haqqında ilkin məlumatların elan edilməsi nəzərdə tutulur.
Seçkilər başa çatdıqdan dərhal sonra seçki məntəqələrindən və dairələrindən səsvermənin yekunları haqqında ilkin məlumatlar daxil olduqca, MSK-nın saytına yerləşdiriləcək.
Seçki məntəqələri üzrə səsvermə yekunları haqqında protokolların ilk nüsxələri 24 saatdan gec olmayaraq dairə seçki komissiyalarına çatdırılmalıdır.
Bu zaman üçüncü nüsxələr məntəqələrdə asılmalıdır.
Dairə seçki komissiyalarından protokollarının ilk nüsxələri aprelin 13-dən gec olmayaraq MSK-ya təqdim edilməlidir.
MSK seçkilərə yekun vurmalı və yekunları aprelin 21-nə qədər təsdiq edilməsi üçün Konstitusiya Məhkəməsinə təqdim etməlidir.
Azərbaycan Respublikası Prezidenti seçkilərinin yekunları rəsmi olaraq Azərbaycan Konstitusiya Məhkəməsi tərəfindən səsvermədən sonra 14 gün ərzində, yəni aprelin 25-nə qədər rəsmi elan edilməlidir.
