“Əli və Nino” kitab şəbəkəsinin rəhbəri Nigar Köçərli bu gün Facebook sosial şəbəkəsində fövqəladə hallar naziri Kəmaləddin Heydərova müraciət edib. O, müraciətində deyir ki, 4 il əvvəl Gilan Holdinqin nümayəndəsi onu holdinqin mərkəzi ofisinə dəvət edib və deyib ki, “Əli və Nino”nu onlara verməlidir: “Əgər verməsən, biz fil, sən isə qarışqa – səni əzəcəyik. Mənim qardaşım bir vaxtlar kredit götürməklə Göyçayda nar şirələri istehsal edən mini-zavod açmışdı. Sizin adamlar o zavodu onun əlindən zorla aldılar, qardaşım müflis oldu. O vaxtdan xeyli vaxt keçib. Belə çıxır ki, növbə mənə çatdı. Sizin oğlunuz mənim dükanlarımı əlimdən alır”.
Azərbaycanda bizneslə məşğul olan tək-tük qadınlardan biri kimi nazirə müraciət etdiyini deyən Nigar Köçərli ondan əl çəkmələrini xahiş edib:
“Əlbəttə, mənim arxamda böyük pullar və böyük adamlar yoxdur. Amma mənim arxamda, bir Azərbaycan qadınının böyük zəhməti, vicdanlı və halal əməyi durur. Sizdən xahiş edirəm ki, öz adamlarınıza deyəsiniz ki, məndən əl çəksinlər”.
