Hüquq müdafiə təşkilatı Amnesty International gənc fəal Ülvi Həsənlinin əsgərliyə aparılması ilə bağlı petisiya elan edib. Petisiya ilə bağlı təşkilatın saytında yerləşdirilən məlumatda qeyd edilir ki, gənc fəalın sağlamlığı imkan vermədiyi halda o, hərbi xidmətə çağırılıb.
Həmin petisiya da müdafiə naziri Zakir Həsənovun, Dövlət Səfərbərlik xidmətinin rəisi Arzu Rəhimovun, Azərbaycanın Rusiyada səfiri Polad Bülbüloğlunun adına müraciət formasında hazırlanıb və təşkilatın saytında imzalamaq üçün açıq elan edib.
Amnesty International hesab edir ki, Ülvi Həsənlinin qeyri-qanuni əsgərliyə aparılması onun fəaliyyəti ilə bağlıdır. Təşkilat həm də qeyd edib ki, artıq bir neçə dəfədir ki, Azərbaycan hakimiyyəti hərbi xidmətə çağırışı fəallara qarşı təzyiq kimi istifadə edir.
Ülvi Həsənli 2017-ci ilin sentyabrında tibbi müayinə keçib və onun sidik kisəsində daş aşkarlanıb. Buna görə də o, 2019-cu ilə qədər hərbi xidmətdən azad edilib. Amma o, 2017-ci ilin oktyabrın 26-da, səhər saat 12-də üç hərbçi tərəfindən saxlanılaraq məcburi şəkildə Səfərbərlik Xidmətinə aparılıb. Bu barədə fəal sosial şəbəkədə məlumat yayıb:
“Orada 2017-ci ildə komissiyalardan necə keçməyim haqda izahat yazdırdılar. Bir-iki saat gözlətdilər. İdarədən çıxanda Gəncə Şəhər Hərbi Komissarlığının rəisi mənə “Bakı Hərbi Polisinə gedirik”, – dedi. 15-20 dəqiqə orda saxladıqları zaman mübahisə etdim ki, ailəm və dostlarım var. Məndən narahatdırlar. Bəlkə oğurlayıb, harasa aparırsınız. Bu insanları məlumatlandırmalıyam. Mənə Bərdə polisinə getdiyimizi dedilər”.
Ülvi Həsənli 2013-cü ildən NİDA Vətəndaş Hərəkatının üzvüdür.
