“Əli və Nino” kitab şəbəkəsinin sahibi Nigar Köçərlinin ötən gün Facebook-da fövqəladə hallar naziri Kəmaləddin Heydərova şiakyət ünvanlayıb. Şikayətdə nazirin oğlu Tale Heydərovun da adını çəkən N.Köçərli onun sahibi olduğu kitab mağazalarının qəsdən sıxışdırıldığını iddia edib.
Xanım sahibkarın videosunda adını çəkdiyi kitab mağazalar şəbəkəsi Tale Heydərovun təsisçisi olduğu Azərbaycan Avropa Cəmiyyətinin (TEAS) törəmə şirkətləri olan TEAS Press və Libraff kitab mağazalarıdır.
Adı çəkilən kitab mağazası bu gün Nigar Köçrəlinin iddialarına cavab verib. “Qafqazinfo.az” saytında yayımlanan açıqlamada deyilir ki, Libraff kitab mağazaları 2017-ci ildən açılmağa başlayıb:
“Məntiqi sual yaranır: əgər N.Köçərliyə qarşı bu “hücumlar” son 4 ildə doğrudan da olubsa, onda, iddia edildiyi kimi, “o fil qarışqanı niyə əzməyib”, hətta əksinə, ticarət mərkəzlərində yeni mağazaları açılıb? İttiham etmək asandır, amma bu ittihamlar sübut olunmalıdır, əks halda onu böhtan saymaq lazım gəlir.
“LİBRAFF” kitab satışı ilə peşəkar şəkildə məşğul olmağa başlayandan N.Köçərli və tərəfdaşları tərəfindən mənəvi təzyiqlərə və böhtanlara məruz qalıb. TEAS Press Nəşriyyat evinin kitab bazarını inhisara alacağı şayiəsi sosial şəbəkələrdə məqsədli şəkildə və mütəmadi olaraq yayılıb, qurum haqda mənfi ictimai rəyin formalaşdırılmasına çalışılıb”.
Kitab evi Nigar Köçərlini rəqabətə davam gətirə bilməməkdə də ittiham edib:
“N.Köçərlinin müraciəti də həmin kampaniyanın tərkib hissəsi və davamıdır. Təlaşın səbəbi bəllidir – sağlam rəqabətə davam gətirmək çətinləşəndə qurşaqdan aşağı zərbə vurursan”.
Açıqlamada həm də iddia edilir ki, mağazalarda gizli çəkilişlər aparılıb, eləcə də TEAS Pressin nəşr etdiyi kitablar qanunsuz şəkildə çap edilərək “Əli və Nino” mağazalarında satılıb”.
Nigar Köçərlinin müraciəti
Bəs iki gündür müzakirə mövzusu olan bu nəşriyyat nə vaxt yaranıb, hansı fəaliyyətlə məşğuldur?
“Google” axtarış sistemində “Tale Heydərov” və “nəşriyyat” sözlərini yazanda ilk olaraq nazirin oğlu haqqında Vikipediya məlumatları çıxır. Həmin məlumatların da sırasında qeyd olunur ki, o, 2014-cü ildə TEAS Press nəşriyyat evini təsis edib.
Adı çəkilən nəşriyyatın rəsmi saytında da həmin məlumata rast gəlmək mümkündür. Bundan başqa mətbuatda da adı çəkilən nəşriyyatın təqdimatı ilə bağlı xəbərlər yer alıb.
Nəşriyyatın təsisçisi Tale Heydərov 2006-cı ildə Londonda təhsil aldığı müddətdə əvvəlcə Azərbaycan Cəmiyyətini yaradıb, sonradan isə bu qurum Avropa Azərbaycan Cəmiyyəti, yəni “The European Azerbaijan Society”ə çevrilib. www.teas.eu-da qeyd olunan məlumata görə, qurumun yaradılmasında məqsəd Azərbaycanı Avropaya tanıtmaq olub.
Üç aydan bir nəşr edilən ingilisdilli “Visions of Azerbaijan” jurnalının da baş redaktoru olan Tale Heydərov 2014-cü ildə TEAS Press Nəşriyyat evini təsis edib.
Vergilər Nazirliyinin rəsmi saytında qeyd olunan məlumata görə, rəsmi təmsilçisi Taleh Bağırov olan nəşriyyat 2014-cü il yanvarın 8-də, 4500 AZN nizamnamə kapitalı ilə yaradılıb.
Nəşriyyatın rəsmi saytında qeyd olunur ki, “TEAS Press”in yaradılmasında məqsəd müasir dünya ədəbiyyatını Azərbaycan oxucusuna tanıtmaq, əhali arasında kütləvi oxu vərdişlərini bərpa və daha da inkişaf etdirmək və s.dir.
Hazırda “TEAS Press” dünyanın bir çox nəşriyyatları ilə əməkdaşlıq edir, müxtəlif janrlarda – bədii, elmi kütləvi, tarixi və s., eləcə də müxtəlif dillərdə – ingilis, rus, türk, alman, ərəb və fransız dillərində kitablar nəşr edir. Bununla yanaşı nəşriyyatın “Üç alma” uşaq ədəbiyyatı bölməsi də var.
Nəşriyyatın çap etdiyi kitablar əsasən “Libraff” kitab mağazası şəbəkəsində satılır. Bu mağaza satış nöqtəsi kimi “TEAS Press”in rəsmi internet səhifəsində də qeyd olunub. Bakı şəhərindəki satış nöqtələri sırasında “Libraff”la yanaşı başqa bir neçə kitab mağazasının da adı var.
