“Tehran özünün raket proqramını beynəlxalq nəzarət altına verməyəcək”. Bunu İranın xarici işlər naziri Mohammad Javad Zarif fevralın 19-da Moskvada deyib.
ABŞ prezidenti Donald Trump 2015-ci ildə İranla imzalanan nüvə sazişinə dəyişikliklər edilməzsə, Vaşinqtonun bu razılaşmadan çıxacağı ilə hədələməsinə və nüvə sazişinə Tehrana ballistik raketlərin inkişaf və istehsalının qadağan edilməsini nəzərdə tutan düzəlişin edilməsi ilə bağlı jurnalistlərin sualını cavablandıran İran rəsmisi deyib ki, Tehran öz raket proqramını kənar monitorinqə verməyi planlaşdırmır və buna ehtiyac görmür. Əlavə edib ki, “ABŞ prezidentinin heç vaxt gerçəkləşməyəcək böyük ambisiyaları var”.
Tam adı Birgə Hərtərəfli Hərəkət Proqramı (Joint Comprehensive Plan of Action) olan 2015-ci il nüvə sazişi Tehranın nüvə proqramının məhdudlaşdırılmasını və bunun müqabilində İran üzərindəki beynəlxalq sanksiyaların qaldırılmasını nəzərdə tutur.
