Sabiq dövlət katibi Eldar Namazovun sədri olduğu “Deportasiya” İctimai Birliyinin iclasında azərbaycanlıların Ermənistandan deportasiyasının ildönümünə həsr olunan iclas keçirib. İclasda eyni zamanda seçkilər də müzakirə olunub. Sabiq təhsil naziri, professor Firudin Cəlilov çıxışında hazırkı prezident İlham Əliyevin namizədliyini dəstəkləmək üçün çağırış edib.
Müzakirələr zamanı danışan Qaçqınlar cəmiyyətin sədr müavini Cümşüd Dərələyəzli , “Deportasiya“ birliyinin idarə heyətinin üzvləri Nurəddin Osmanlı və keçmiş baş prokuror Əli Ömərov da qarşıdan gələn seçkilərdə prezident İlham Əliyevin namizədliyini dəstəkləməyi vacib sayıblar.
Eldar Namazov bununla bağlı müsavat.com-a açıqlamasında bildirib ki, tədbirdə hər kəs şəxsi mövqeyini ifadə edib:
“O ki, qaldı seçki ilə bağlı mənim şəxsi mövqeyimə, mən bu yaxınlarda bəyan etmişəm ki, seçkilərin nəticəsi mənim üçün bəllidir və dəyişiklik olmayacaq, İlham Əliyev prezident seçiləcək. Məni daha çox maraqlandıran seçkidən sonra olan proseslərdir – islahatlar necə gedəcək, olacaqmı, Qarabağ məsələsində hansı addımlar atılacaq? Bu kimi məsələlər mənim üçün daha çox önəmlidir”.
