Azərbaycanda daha bir neçə rayonda sənaye məhəllələrinin yaradılması planlaşdırılır. Azərbaycan İnvestisiya Şirkətinin (AİŞ) icraçı direktoru bildirib ki, bu məqsədlə bütün rayonları nəzərdən keçirirlər. “APA-Economics”in məlumatına görə, araşdırmalardan sonra ictimaiyyətə yeni rayonların adları açıqlanacaq.
Bəs sənaye məhəllələri nədir? Nəyə lazımdır? Onların iqtisadiyyata hansısa xeyiri varmı?
“Sənaye məhəllələri haqqında” nümunəvi Əsasnamədə sənaye məhəllələri belə izah olunur – sənaye məhəlləsi sahibkarlıq fəaliyyətinin həyata keçirilməsi üçün zəruri infrastruktura malik olan, kiçik və orta sahibkarlar tərəfindən məhsul istehsalı və xidmət göstərilməsi üçün istifadə edilən ərazidir.
Əsasnamədə deyilir ki, bu məhəllələrin yaradılmasında məqsəd kiçik və orta sahibkarların inkişafı üçün əlverişli şərait təmin etməkdir.
Sənaye məhəllələrinin yaradılması və ləğv edilməsi ilə bağlı təkliflər, eləcə də onun illik hesabaları ölkə prezidentinə təqdim edilir.
Hazırda Azərbaycanda 6 rayonda sənaye məhəlləsi var. Bunlar Neftçala, Masallı, Hacıqabul, Mingəçevir, Qaradağ və Sabirabaddır. Bu məhəllələrin yaradılması, orada müəssisələrin tikilməsi üçün hər birinə milyonlarla manat pul xərclənib.
Məsələn, 2017-ci ilin sentyabrında açılışı baş tutan Neftçala sənaye məhəlləsi iştirakçıları tərəfindən istehsal sahələrinin yaradılmasına 45,3 milyon manat investisiya yatırılıb.
Yaradılması haqqında 2017-ci ilin iyulunda sərəncam imzalanan Hacıqabul Sənaye Məhəlləsinə isə prezidentin Ehtiyat Fondundan 4 milyon manat ayrılıb.
Hökumət bu məhəllələrin qeyri-neft sektorunu inkişaf etdirməsi ilə əsaslandırsa da yerli sakinlər vəziyyətin göründüyü kimi olmadığını iddia edir. Ötən il mətbuata açıqlama verən və Masallıdan olan sahibkar Toğrul Həsənli deyib ki, yerli sahibkarlar həmin məhəllələrdən yararlana bilmir. Həmin sənaye zonasında iki pomidor tomat konserva zavodu olsa da heç biri işləmir.
cover fotosu: president.az
