Foto: DTX

Dövlət Təhlükəsizliyi Xidmətinin (DTX) əməliyyatı zamanı terror törətməyi planlaşdırmaqda şübhəli bilinən iki nəfər zərərsizləşdirilib. “Xaçmaz camaatı” adlanan dini ekstremist cinayətkar qrup üzvlərinin zərərsizləşdirildiyi yerdə kustar üsulla hazırlanmış partlayıcı qurğu və partlayıcı maddələr də aşkar edilib.

DTX-nin İctimai əlaqələr şöbəsindən Trend-ə verilən məlumata görə, fakt üzrə Azərbaycan Respublikası Cinayət Məcəlləsinin 28, 214.2.1, 214.2.3 (terrorçuluğa hazırlıq), 218.2 (cinayət birlikdə iştirak etmə) maddələri ilə başlanılan cinayət işi üzrə təxirəsalınmaz kompleks əməliyyat tədbirləri keçirilib.

Cinayətkar birliyin üzvlərindən – Məmmədov Sabir Ərulla oğlu və Səlimov Tərlan Səfər oğlunun Xaçmaz rayonu ərazisində tərkisilah olunmaları və cinayət məsuliyyətinə cəlb edilmələri üzrə keçirilən əməliyyat tədbirləri zamanı sonuncular təslim olmaq barədə qanuni tələblərə tabe olmayaraq odlu silahdan atəş açıb silahlı müqavimət göstərib. Əməliyyat qrupu tərəfindən cavab tədbiri olaraq xidməti silahdan istifadə edilməklə S.Məmmədov və T.Səlimov zərərsizləşdirilib.