Avropa Parlamenti Azərbaycanda bu il aprelin 11-də baş tutacaq növbədənkənar prezident seçkilərini müşahidə etməyəcəyini açıqlayıb. Bu barədə Avropa Parlamentinin Demokratiyaya dəstək və seçki koordinasiya qrupunun həmsədrləri Makallister və Makavan bəyanat yayıb.
APA-nın məlumatına görə, bəyanatda deyilir ki, AP-nın heç bir üzvünə müşahidə üçün mandat verilməyib, buna görə də qurum seçkilərlə bağlı ümumiyyətlə şərh verməyəcək.
Bu seçkidən fərqli olaraq Avropa Parlamenti bir neçə dəfə Azərbaycana müşahidə missiyası göndərib. 1995, 2005 və 2010-cu il Parlament seçkiləri, 2008 və 2013-cü il Prezident seçkilərini müşahidə edib hesabat yayıb.
2010-cu il Parlament seçkilərindən sonra qurumun yaydığı hesabatda qeyd olunub ki, seçki sülh şəraitində və müxalifət partiyalarının da iştirakı ilə keçib, amma bu seçkilərin keçirilməsi ölkənin demokratik yöndə inkişafında irəliləyiş əldə etmək üçün kifayət deyil.
2013-cü il Prezident seçkiləri ilə bağlı yaydıqları yekun sənəddə isə qeyd olunur ki, Azərbaycanda şəffaf, ədalətli və azad seçki keçirilib.
