“Martın 8-də Tovuz rayon Polis Şöbəsində dindirilmə zamanı özünü 3-cü mərtəbədən atan rayon sakini Tofiq Şükürovun şöbədə işgəncə görməsi barədə məlumatlar yalandır”. Bunu “Turan” agentliyinə Tovuz Rayon Polis Şöbəsindən bildiriblər.
Dünən hüquq müdafiəçisi Taleh Xasməmmədov Tovuz Rayon Polis Şöbəsində saxlanılan şəxsin özünü 3-cü mərtəbədən atması ilə bağlı xəbər yayıb. Daha sonra isə intihara cəhd edən Tofiq Şükürovun işgəncələrə məruz qaldığı üçün bu addımı atdığı yayılıb.
https://www.facebook.com/tale.xasmemmedov/posts/1606599346055995?pnref=story
Tovuz Rayon Polis Şöbəsi saxlanılan şəxsə işgəncə verilməsi barədə məlumatları təkzib edib.
O, narkotik cinayətinə görə məhkum edilmiş şəxsdir. Rayonda oğurluq olub, tibb bacısının evindən 5 min manat pul oğurlanıb. T. Şükürov həmin iş üzrə dindirilib. Müstəntiq ondan dəhlizdə gözləməsini istəyib. Həmin vaxt hadisə baş verib. Ağlına nə gəlibsə, buna əl atıb.
Şöbədən onu da deyiblər ki, T. Şükürovun indi sağlıq durumu normaldır.
Tovuz Rayon Xəstəxanası T. Şükürovun martın 8-də qəbul edib. Xəstəxananın həkimi Paşa Muradov T. Şükürovun müayinə edildiyini, onun xəsarətlərinin ağır olmadığını və müalicə məqsədi ilə Qazax rayonuna göndərildiyini bildirib.
Azadlıq Radiosu isə yazır ki, hələlik T. Şükürovun yaxınları və Qazax Rayon Xəstəxanası ilə isə əlaqə saxlamaq mümkün olmayıb.
- 2015-ci il avqustun 20-də Bəhruz Hacıyev adlı şəxs Mingəçevir Şəhər Polis Şöbəsində vəfat etmişdi. Polisin məlumatında onun özünü idarənin pəncərəsindən atıb intihar etdiyi bildirilirdi. Hacıyevin yaxınları isə intihar barədə deyilənlərlə razılaşmır və onun işgəncə ilə öldürüldüyünü iddia edib.
