Bu gün Milli Şura və Müsavat Partiyasının birgə mitinqi keçirilir. Saat 15:00-da Azərbaycan dövlət himninin oxunması ilə başlayan mitinqdə indiyə qədər Azərbaycan Xalq Cəbhəsi Partiyasının sədri Əli Kərimli və Müsavat Partiyasının başqan müavini Səxavət Soltanlı çıxış edib.
Əli Kərimli nitqində hazırda həbsdə olan partiya funksioneri Gözəl Bayramlının azad edilməsi çağırışı edib. Partiya sədri mitinq iştirakçılarına qarşı aparılan kampaniyalardan danışıb:
Hər zaman millətə qarşı olanlar olacaq. Hər zaman rejimdən qidalanıb sizin bu fədakarlığınızı kiçiltmiş olanlar olacaq. Siz onlara fikir verməyin. Bu ölkənin bütün haqlarının sahibi olması üçün, bu millətin özgürlüyünə, ədalətinə sahib olması üçün yola davam deyəcəyik, mübarizəyə davam deyəcəyik, azadlıq deyəcəyik, Azərbaycan deyəcəyik! Eşq olsun sizlərə! Son 3 il ərzində 2.5 dəfə bu milləti kasıblaşdırmısız bu milləti. Onun sərvətlərinə əl qoymusuz, sərvətlərini bu ölkədən daşımısız. Ətrafınıza oğruları, korrpusionerləri toplamısız. Hər cür fəlakətdən onu qorumaq üçün əlini tərpətməyən anti-xalq hakimiyyətə bu ölkədə yer yoxdur.
Müsavat Partiyasının başqan müavini Səxavət Soltanlı isə mitinqin əsas səbəblərindən danışıb və qeyd edib ki, bu, aprel ayında keçiriləcək növbədənkənar prezident seçkiləridir:
Bu onu göstərir ki, Azərbaycan müxalifətinin birgə mitinqinin davamlı və güclü olmasından Azərbaycan hakimiyyəti narahatdır və qorxur. Azərbaycan hakimiyyəti görür ki, Azərbaycan müxalifətinin içinə saldığı emmisarlara, ayrıseçkilərə baxmayaraq Azərbaycan müxalifəti Azərbaycan xalqının və dövlətinin qürurunu qorumaq üçün lazım olan yerdə , lazım olan anda bir yerdədir. Müxalifətin birgə mitinqinin səbəblərindən biri də ölkə rəhbəri tərəfindən oğurluq, gizli, xalqdan xəbərsiz seçkiyə qərar verməsidir.
