“Freedom House” təşkilatı ənənəvi olaraq dünyadakı söz və ifadə azadlığının vəziyyəti ilə bağlı 2017-ci il üçün olan göstəriciləri açıqlayıb. 195 ölkə üzrə hazırlanan hesabatda bu ölkələrdəki siyasi vəziyyət və mülki azadlıqlarla bağlı reytinqlər yer alıb.
Azərbaycanın da daxil olduğu siyahıda ölkədə siyasi hüquqların vəziyyəti 7/7 balla qiymətləndirilib. Təşkilatın qiymətləndirmə sisteminə görə, 1 bal “ən çox azad”, 7 isə “ən az azad” hesab olunur.
Mülki azadlıqlar sahəsindəki vəziyyət isə 6/7 kimi qiymətləndirilib.
Azərbaycanda mətbuatın vəziyyəti “Azad olmayan” kateqoriyasına aid edilib. Ümumilikdə isə ölkə “qismən azad” ölkələr sırasındadır.
Ümumi hesabda isə Azərbaycanın vəziyyəti 12/100 kimi qeyd edilib. Qiymətləndirmə sisteminə görə, 100 ən çox azad, 0 isə ən az azad olmaq hesab edilir.
Siyahıda Ermənistan və Gürcüstan haqqında da dəyərləndirmə yer alıb.
Ermənistanda mətbuatın vəziyyəti “azad olmayan”, ölkənin ümumi vəziyyəti isə “qismən azad” kateqoriyasına aid edilib. Bal sistemi ilə dəyərləndirməyə görə, qonşu ölkədə siyasi hüquqlar 5/7, mülki azadlıqlar isə 4/7-dür. Qonşu ölkənin ümumi hesabı isə 45/100-dir ki, bu da Azərbaycandan daha yaxşı hesab olunur.
Təşkilatın müşahidələrinin nəticəsinə görə, Gürcüstanda vəziyyət Azərbaycan və Ermənistandan daha ürəkaçandır. Belə ki, ölkənin adı ümumi reytinqdə 64/100-dür. Mətbuat “qismən azad” kateqoriyasındadır və ölkədə ümumi vəziyyət də “qismən azad” kimi qiymətləndirilib. Gürcüstanda siyasi hüquqlar 3/7, mülki azadlıqlar da 3/7 kimi dəyərləndirilib.
Ümumi hesab siyahısında az da olsa 100/100 balla qiymətləndirilib azad hesab olunan ölkələr var. Bunlar Norveç, İsveç və Finlandiyadır. Buna baxmayaraq təşkilat dünyada söz azadlığının vəziyyətinin pis olduğunu hesab edir. Qurumun hesabatı da “Demokratiya böhranda” başlığı ilə yayımlanıb.
