Bu gün seçkilərlə bağlı keçirilən debatların ikinci günüdür. Bu dəfəki mövzu “Regionların sosial iqtisadi inkişafı” olub. İlham Əliyevin səlahiyyətli nümayəndəsi Əli Əhmədov dünənki debatda Sərdar Cəlaloğlunun hakimiyyəti tənqid edən fikirləri bağlı danışıb və ona iqtidarın inkişaf etməsini göstərən amillərin yazıldığı bukleti təqdim edib. Sərdar Cəlaloğlu isə buna cavab olaraq 2017 və 2018-ci illərin dövlət büdcəsini göstərib və müqayisə aparıb.
Əli Əhmədov:
Bəzi deputatlığa (red-prezidentliyə namizədlər nəzərdə tutulur) namizədlərin həddindən artıq əsaslı olmadan faktlara söykənməyən tənqidlərə alüdəçiliyini də vurğulamaq istəyirəm. Bunu bəlkə də faktlarla mübahisə etmək kimi qiymətləndirmək istəyərdim, amma mənim solumda oturan Sərdar Məmmədov faktları da mübahisəni də çox sevir. Ona görə də mən bizim partiya tərəfindən hazırlanan Azərbaycanın inkişafını özündə əks etdirən faktlardan ibarət olan bukleti özümlə gətirmişəm ki, ona təqdim edəm və Azərbaycanın prezident İlham Əliyevin rəhbərliyi altında nə qədər inkişaf yolu keçdiyi haqqında faktlar ona məlum olsun. Güman edirəm ki, bu məlumdur. Əgər bu faktlarla da o mübahisə etsə, düşünəcəm ki, onunla diskussiya etməyin heç bir mənası yoxdur.
Sərdar Cəlaloğlunun cavabı:
Mən bilirdim ki, bizim hörmətli dostumuz Əli bəy mənə mütləq deyəcək ki, sən faktlarla danışmırsan. Ona görə də bunu gətirib, seçki qabağı bukleti mən də dövlət büdcəsini gətirmişəm bura. 2017 və 2018-ci ilin dövlət büdcəsini sizin gözünüzün qarşısında müqayisə etmək istəyirəm. 2017-ci ildə Azərbaycan dövlət büdcəsinin ümumi gəlirləri rayon mərkəzləri və Bakı daxil olmaqla 7 milyard 210 milyon manat olub. Bunun 6 milyard 613 milyonu yalınız Bakı şəhərinin hesabına düşür. Yerdə qalır 597 milyon. 2018-ci ildə ümumi rayon mərkəzləri ilə Bakının gəliri 7 milyard 907 milyondur. Bunun 7 milyard 280 milyonu düşür Bakının hesabına, 613 milyon yerdə qalan Sumqayıt da daxil olmaqla bütün rayon mərkəzlərinin hesabına düşür. Əgər 2017 və 2018-ci illərdəki iki rəqəmi bir-birindən çıxsaq görəcəyik ki, Azərbaycan iqtidarının bu regional inkişaf dediyi siyasət 2018-ci ildə 15 milyon cəmisi vəsaitin artmasına səbəb olub ki, bu vəsait də 2017-ci ildə manatın devalvasiyasının 10-da birini təşkil eləmir. Yəni keçən il dollar 150 manat idi bu il 170 manatdır. Həm də bu artım manatın infilyasiyasından da qat-qat aşağıdır. Siz əgər buna iqtisadi inkişaf deyirsizsə, manat ölə-ölə tutaq ki, bu büdcə də süni şəkildə arta-arta gedəcəksə, bu, onda təmamilə siyasətdən, iqtisadiyyatdan, elmdən kənar məsələdir.
