Azərbaycanda Siyasi Məhbusların Vahid Siyahısının hazırlanması üzrə İşçi Qrup növbəti siyasi məhbus siyahının yenilənmiş variantını ictimaiyyətə təqdim edib. Siyahıda İşçi Qrupun apardığı araşdırmalar nəticəsində 20 mart 2018-ci il tarixinə qədər cinayət təqibində siyasi motivlərin olduğu müəyyən olunan şəxslərin sayı 142, monitorinq altında olanların sayı isə 2-dir.
İşçi qrupun yaydığı məlumatda bildirilir ki, siyahı üzərində iş zamanı ölkədə söz və toplaşma azadlığı kimi fundamental haqlarından istifadə edənlərin həbslərinin artdığı, eləcə də hökumətin dinc inanclı kəsimə qarşı repressiyalarının davam etdiyi müşahidə edilib.
Qrupun siyasi məhbus kimi tanıdığı 142 nəfər aşağıdakı kimi kateqoriyalaşdırılıb:
- 11-i jurnalist və bloger,
- 2-si şair və yazar,
- 1-i hüquq müdafiəçisi,
- 12-si siyasi və ictimai fəal,
- 83-ü inanclı fəal,
- 3-ü isə ömürlük həbs olunma cəzasına məhkum olunanlar,
- 15-i sosial etirazlarla bağlı tutulanlar,
- 2-si keçmiş dövlət məmurları,
- 3-ü siyasi girovla,
- 10-u Səid Dadaşbəyli və onunla birgə tutulanlar.
