Rusiyada, Sibirin Kemerovo şəhərində baş verən yanğına görə şəhərdə minlərlə adam etiraz aksiyası keçirir. Hadisə nəticəsində həlak olan 60-dan çox insanın yaxını və digər sakinlər regionun qubernatoru Aman Tuleyevin istefasını tələb edir. Azadlıq Radiosu xəbər verir ki, aksiyadakı plakatlardan birində həm yeni seçilən prezident Vladimir Putin, həm də qubernator Aman Tuleyevin həbsinə çağırış var.
Etirazçılar həm də “Korrupsiya öldürür!”, “İstefa!”, “Bizə həqiqəti deyin!” şüarları səsləndiriblər. Aksiya iştirakçıları arasında ölənlərin sayının dəqiq açıqlanmadığını düşünür.
Reuters İnformasiya Agentliyinin yaydığı məlumatda isə bildirilir ki, hadisə ilə bağlı açıqlamasında yanğının “kriminal səhlənkarlıq” səbəbindən baş verdiyini deyib:
“Burada nə baş verir? Bu, müharibə deyil, gözlənilmədən mədəndə baş verən metan qazı sızıntısı deyil. İnsanlar, uşaqlar istirahətə gəlib. Biz demoqrafiyadan danışırıq və çoxlu sayda insan itiririk. Niyə? Kriminal səhlənkarlığa görə. Bu necə baş verə bilər?”
Prezident Kemerovoda keçirdiyi görüşlərdə günahkarların cəzalandırılacağını da bəyan edib.
Martın 26-da “Zimnaya Vişnya” ticarət mərkəzində baş verən yanğında 60-dan çox adam həlak olub. Onlardan 41-i uşaqdır. Yanğın ticarət mərkəzinin kino zal və uşaq əyləncə mərkəzləri olan 4-cü mərtəbəsində başladığından ölənlər arasında uşaqlar daha çoxdur. Hadisə nəticəsində 10-dan çox adamın da itkin düşdüyü bildirilir.
Yanğın zamanı ticarət mərkəzinin çıxışlarının qeyri-qanuni olaraq bağlandığı da iddia edilir.
Mart ayının 28-ə isə yanğınla bağlı bütün Rusiyada matəm elan edilib.
