Zavod açılışı, görüşlər, proqram, memorandum imzalama. Həsən Ruhaninin Bakı səfərinin xronologiyası

İran prezidenti Həsən Ruhaninin ötən gün Azərbaycana iki günlük rəsmi səfəri başlayıb. Prezidentin səfəri zamanı keçirdiyi görüşlər, imzalanan sənədlər və müzakirə olunan mövzuların xülasəsini təqdim edirik.

Səfər martın 28-i Azərbaycan prezidenti İlham Əliyevin iranlı həmkarını rəsmi qarşılama mərasimi ilə başlayıb. Səfərdə olan İran nümayəndə heyətinə İran xarici işlər naziri, neft naziri, sənaye, mədən və ticarət naziri, idman və gənclər naziri, İran prezident aparatının rəhbəri və nəqliyyat naziri daxildir.

Nümayəndə heyətində olan nazirlər azərbaycanlı həmkarları ilə ümumilikdə 8 sənəd imzalayıblar. Müxtəlif proqram və anlaşma memorandumlarından ibarət olan sənədlər ailə, qadın və uşaq, gənclər, mədəniyyət və turizm, iqtisadiyyat, eləcə də maliyyə sahələrində olub.

Sənədlərin imzalanması başa çatandan sonra prezidentlər mətbuata bəyanatlarla çıxış ediblər.

Azərbaycan prezidenti İlham Əliyevin nitqindən bir neçə çıxarış:

1 İran Azərbaycana, Azərbaycan İrana sərmayə qoyur və bu sərmayə qoyuluşu hər iki tərəfin maraqlarına xidmət göstərir. Əminəm ki, bu səfərdən sonra, – biz bu gün bu barədə də danışmışıq, – əlavə sərmayə qoyuluşunun təşkili nəzərdə tutulacaqdır.
2 Keçən il mən İranda səfərdə olarkən biz Azərbaycandan İrana birinci qatarın qəbul olunmasını qeyd etmişik. Astaraçay üzərində tikilmiş körpü vasitəsilə birinci qatar İrana qədəm qoymuşdur.
3 Bu yaxınlarda – iki həftə bundan əvvəl Azərbaycanda qəbul edilmiş qərara əsasən İran vətəndaşları Azərbaycanda vizaları aeroportlarda alacaqlar. Artıq bu proses başlamışdır, yəni, sadələşdirilmiş viza rejimi həm bizim dostluğumuzu əks etdirir, eyni zamanda, turistlərin axınını şərtləndirir.

İran İslam Respublikasının prezidenti Həsən Ruhaninin nitqindən bir neçə çıxarış:
1 Gələcəkdə dərman istehsalı, səhiyyə və enerji mübadiləsi sahələrində əməkdaşlığımızı genişləndirə bilərik.

2 İki prezidentin və iki dövlətin bu gün qəbul etdiyi qərarların icrası üçün ciddi səylər göstərilməlidir. Banklar arasında əməkdaşlıq qarşımızda duran əsas məsələlərdən biridir. İki ölkənin müştərək komissiyası çalışmalıdırlar ki, bu sahədə əməkdaşlıq yaxşılaşsın.
3 Bizim üçün əhəmiyyətlidir ki, ölkələrin ərazi bütövlüyü və bölgənin coğrafiyası dəyişməməlidir. Dünya ictimaiyyətinin hörmətlə yanaşdığı beynəlxalq prinsiplər məsələnin həlli üçün alətə çevrilməlidir.

Həsən Ruhaninin şərəfinə təşkil olunan rəsmi qəbuldan sonra prezidentlərin həm təkbətək, həm də geniş tərkibdə görüşü baş tutub.

Rəsmi səfərin ikinci günü Azərbaycan və İran biznes forumu ilə başlayıb. Heydər Əliyəv Mərkəzində baş tutan biznes forumda prezidentlər Neftçala Sənaye Məhəlləsində yaradılan “Azərmaş” ASC və “İran Khodro” şirkətinin birgə “Xəzər” avtomobil zavodunun açılışını bildirən düyməni basıblar.

Biznes forumdan sonra Həsən Ruhaninin Azərbaycana səfəri başa çatıb. O, Heydər Əliyev adına hava limanında fəxri qaravul dəstəsinin müşayiəti ilə yola salınıb.