“Təhqir, nifrət, qəzəb, sanki bir söyüş maşını işə düşüb və bu maşını dayandırmaq mümkün deyil. Məqsəd cəmiyyətdə vətəndaş qarşıdurması yaratmaq, hakimiyyətlə xalq arasında münasibətləri pozmaqdır”.
Bu sözləri Mətbuat Şurasının təşkilatçılığı ilə “İnternet media və sosial şəbəkələrdə milli-mənəvi dəyərlərin qorunması: Media həmrəyliyi” mövzusundakı tədbirdə çıxış edən Mətbuat Şurasının sədri Əflatun Amaşov deyib.
“Bu yaxınlarda Məhəmməd Mirzəli və Orduxan Temirxan arasında dialoq yayıldı, onlar açıq şəkildə Azərbaycanda dövlət çevrilişinə çağırışlar edirdilər. Bu məsələlər bizi narahat etdi. Yəqin ki, müvafiq dövlət orqanları bu məsələləri araşdıracaq, müəyyən işlər görüləcək” – deyə Əflatun Amaşov bildirib.
Azərbaycan prezidentinin ictimai-siyasi məsələlər üzrə köməkçisi Əli Həsənov isə sosial şəbəkələrin Avrasiya və Yaxın Şərq coğrafiyasında, xüsusən də ərəb ölkələrində fəsadlara gətirib çıxarması barədə danışıb:
“Hətta 2011-ci ildə Böyük Britaniyada baş vermiş iğtişaşlar zamanı sosial şəbəkələrdən istifadə məhdudlaşdırıldı və bu addımın “zərərli çağırışların qarşısını almaq” məqsədi daşıdığı bildirildi. Yəqin elə bu səbəbdəndir ki, Azərbaycanla qonşu olan böyük ölkələrdə ayrı-ayrı vaxtlarda sosial şəbəkələr məhdudlaşdırılıb, ya da böyük milli şəbəkələr yaradılmasına cəhd göstərilib. Etiraf etməliyik ki, bəzi ölkələrdə müəyyən nəticələr də əldə olunub”.
Ə. Həsənov onu da deyib ki, bu gün Azərbaycanda “Facebook”, “Twitter”, “Youtube”, “Instaqram” və bu kimi sosial şəbəkələrdə istifadəçilərin sayı 3 milyona yaxınlaşıb və 10 milyona yaxın əhalisi olan bir ölkə üçün bunun həqiqətən də böyük göstərici olduğunu bildirib.
“Təəssüflə qeyd etməliyəm ki, Azərbaycan hakimiyyətinin sosial şəbəkələrə pozitiv münasibəti, bu seqmentdən geniş istifadə üçün yaratdığı hərtərəfli şərait qarşısında bəzi dairələrin mövcud imkanlardan sui-istifadə cəhdləri cəmiyyətimizi narahat etməyə bilməz. Müəyyən xarici qüvvələrin və daxili siyasi qrupların Azərbaycan hakimiyyətinə, bir çox hallarda isə bütövlükdə Azərbaycan dövlətinə qarşı davamlı olaraq iyrənc kampaniya aparması bunu açıq şəkildə göstərir”.
Millət vəkili Aqil Abbas isə Azərbaycanın xaricdəki səfirliklərini olduqları ölkələrin qanunlarına uyğun olaraq bu hallarla mübarizəyə çağırıb: “İlana ağu verənlər burada da var, Azərbaycanın hüquq-mühafizə orqanları belələrinə qarşı da qanun çərçivəsində addımlar atmalıdır”.
