ATƏT-in Demokratik Təsisatlar və İnsan Haqları Bürosu Seçki Müşahidə Missiyası prezident seçkiləri ilə bağlı yaydığı aralıq hesabat tənqid edilir. Hesab edilir ki, hesabat zəifdir və həqiqətləri ört-basdır edir.
REAL hərəkatının İdarə Heyətinin üzvü Azər Qasımlı qeyd edib ki, hesabatın əsas problemi seçkiöncəsi vəziyyətin əsl mahiyyətinin göstərilməməsidir:
“Seçki öncəsi ölkədə siyasi məhbusların olması, müxalif saytların blok edilməsi, müstəqil çap mediasının olmaması, müxalif fikrin və müxalif siyasətçilərin televiziyaya buraxılmaması və s. və i. (siyahını uzatmaq olar…) haqqında ümumiyyətlə danışılmayıb”.
Azər Qasımlı hesabatda İlqar Məmmədovun adı çəkildiyi halda onun lider olduğu hərəkatın adının qeyd olunamamasından da danışıb:
“Bu cümlə isə ümumiyyətlə biabırçılıqdı: “Həmçinin bir siyasi hərəkat da qeyd etmişdir ki, Avropa İnsan Hüquqları Məhkəməsinin (AİHM) qərarlarına baxmayaraq, İlqar Məmmədovun seçkilərdə namizəd kimi iştirakının qarşısı alınmışdır.” Bunu oxuyan nə düşünməlidir? Niyə təşkilatın adı çəkilmir? Niyə İlqar Məmmədovun kimliyi ilə bağlı bir söz yazılmır? Niyə ReAl-a partiya qurultayının keçirilməsi üçün yerin verilmədiyini qeyd etmirsiniz?”
Mərkəzi Seçki Komissiyasının keçmiş üzvü Akif Qurbanov isə bildirib ki, ATƏT-in sonuncu hesabatı 2013 və 2008-ci ildəki rəylərini kölgədə qoyur:
“Bu basa-basda yalnız siyasi qərar əsasında gələn ATƏT Seçki Müşahidə Missiyasının seçkiləri niyə müşahidəyə gəldiklərini elə bugunkü hesabatlarında göstərdilər. İllər uzunu hesabatlarındakı seçki komissiyalarının formalaşması barəsindəki dəyişməyən cümlələri belə tamamən dekonstruksiyaya uğrayıb. Hətta o qədər gül vurublar ki, jurnalist və blogerlərin həbsinin peşə fəaliyyətlərilə əlaqəli olmadığını yazırlar. Ölkədə sanki siyasi məhbus nəinki var, heç onun mövzusundan belə söhbət açılmır”.
https://www.facebook.com/akif.qurbanov.1/posts/1883924761627152
“Seçkilərin Monitorinqi və Demokratiyanın Tədrisi Mərkəzi”nin rəhbəri Anar Məmmədli isə hesabatda qeyd olunmayan detalların qərəzli olmadığını düşünür:
“Hesabat iki həftəlik dönəmə aiddir. Görürəm ki, bu hesabatda bir sıra məqamlar öz əksini tapmayıb. Amma bunun qərəzli olaraq baş verdiyini düşünmürəm. Mənə elə gəlir ki, bu, texniki səbəblərdir. Çünki iki həftə ərzində bu günə qədər olmuş bütün seçkilərlə bağlı dəyişiklikləri, yəni qanunvericiliyə dəyişikliklər, seçki həyatında olan proseslərin hamısını dəqiqləşdirib hesabata yazmaq çətin məsələdir. Bəlkə də çox intensiv çalışsaydılar bunların hamısını əhatə edə bilərdilər, amma əhatəlilik təmin olunmayıb, bir qədər təfsilatlı deyil”.
Anar Məmmədli hesabatda jurnalist və bloggerlərin öz peşə fəaliyyətlərinə aid olmayan səbəblərlə həbsdə olmasına da münasibət bildirib. Onun fikrincə, burada jurnalist və bloggerlərin qondarma ittihamlarla həbsdə olması nəzərdə tutulur:
“Jurnalistlərə gəldikdə isə orada nəzərdə tutulur ki, həbsdə olan jurnalist və bloggerlər öz peşə fəaliyyətləri ilə bağlı maddələrlə yox, başqa, qondarma maddələrlə, siyasi motivlərlə həbs ediliblər, sadəcə cümlənin quruluşu bir qədər əcaibdir. Amma ümumilikdə hesab edirəm ki, bu mühiti təsvir etməyə çalışıblar, göstərməyə çalışıblar ki, ölkədə alternativ siyasi rəqabət yoxdur”.
