Türkiyənin keçmiş baş naziri Mesut Yılmaz’ın oğlu Yavuz Yılmaz’ın dəfn mərasımində hazır ki, prezidenti Rəcəb Tayyip Ərdoğan və CHP başqanı Kamal Kılıçdaroğlu. Foto: aydinlik.com.tr
Türkiyə prezidenti Rəcəb Tayyib Ərdoğan müxalif Cümhuriyyət Xalq Partiyasının (CHP) sədri Kamal Kılıçdaroğlunu məhkəməyə verib və 500 min türk lirəsi (təxminən 212 min manat) mənəvi təzminat tələb edir. NTV Türkiyə xəbər verir ki, buna səbəb Kılıçdaroğlunun Türkiyə Böyük Millət Məclisində partiyasının qrup toplantısındakı çıxışı olub.
Prezidentin vəkili hesab edir ki, partiya sədri çıxışında Ərdoğanın ünvanına ağır təhqirlər deyib və onun şəxsiyyət hüquqlarını pozub. Prezidentin vəkili məhkəməyə 15 səhifəlik iddia ərizəsi təqdim edib.
İddia ərizəsində partiya sədrinin çıxışında səsləndirdiyi fikirlərin əsassız olduğu vurğulanıb:
“Bu iddialarla bağlı əvvəllər dəfələrlə orta səviyəli zəkası olan adamların
da başa düşə biləcəyi şəkildə açıqlamalar verilib. Amma eyni iddiaların
yenidən təkrarlanması göstərir ki, həmin şəxs inandığı yalanların
rahatlığında yaşamağa üstünlük verir”.
Kılıçdaroğlu adı çəkilən toplantıdakı çıxışında Ərdoğanı sərt tənqid edib və onu vətən xaini adlandırıb. Partiya sədri deyib ki, Ərdoğan ədalətsizliyin, qaçaqmalçılığın simvoludur:
“Ölkəmizdə fövqəladə vəziyyət var. Deyir ki, heç kim danışmasın, heç kim
bir söz deməsin, istədiyimi həbs edərəm. Sarayda oturan şəxsə müraciət
edirəm. Sən ədalətsizliyin, qaçaqmalçılığın simvolusan. Öz cibini
düşünürsən. Mən isə insan haqlarını, demokratiyanı müdafiə edirəm.
Fikir azadlığını, qadın-kişi bərabərliyini müdafiə edirəm. Sən badam
südü ilə qidalanırsan, biz isə quru çörəklə”.
