Almaniyanın Frankfurt hava limanında xidmət sektorunda çalışan işçilərin tətil etməsi yüzlərlə uçuşun təxirə salınmasına səbəb olub. Reuters İnformasiya Agentliyi xəbər verir ki, işçilərin tətil etməkdə məqsədi razılıq əldə oluna bilməyən maaş artımı məsələsində təzyiqi artırmaqdır.
“Lufthansa” hava yolu şirkətinin açıqlamasına görə onların planlaşdırılmış 1600 uçuşundan 800-ü təxirə salınıb.
Almaniyanın ən qaynar hava limanlarından olan Frankfurtla yanaşı, Köln, Münix və Bremen aeroportlarında çalışanlar da tətilə qoşulub.
Almaniyanın ən böyük həmkarlar təşkilatlarından biri olan Verdi işçilərin maaşlarının 6 faiz artırılmasını tələb edib. Alman federal hökuməti və bələdiyyələr isə bu təklifi rədd edib.
Sərnişinlər Almaniya xidmət sektoru işlərinin yüksək maaş tələbi ilə keçirdiyi tətilə görə ictimai nəqliyyat bağlı olduğundan piyada gedir. Foto: Kai Pfaffenbach / Reuters
Uçuş vaxtını dəyişmək istəyənlərin çoxluğundan hava limanında uzun növbələr yaranıb. Aksiya ölkədəki bir çox sahələrə də təsir edib. Belə ki, Baden-Vuttemberqdə avtobuslar və qatarlar depolarda qalıb.
Ticarət Birliyinin rəhbəri Frank Bsirske bildirib ki, onlar belə kütləvi tətillə işə götürənlərə aydın mesaj göndərmək istəyirlər. O əlavə edib ki, əgər gələn həftə tutarlı təklif irəli sürülməsə, narazılıq daha da artacaq.
Danışıqların 3-cü mərhələsi aprelin 15-i başlayır.
Almaniyanın Şimali Reyn-Vestfaliya (NRW) əyalətində işçilər bu gündən tətilə başlayıblar. Əhali sayına görə ən böyük əyalətlərdən biri olan bölgədə ictimai nəqliyyat – avtobus, tramvay, qatar və metrolarlar işləmir. Səbəb isə, ictimai nəqliyyat işçilərinin də tətilə qoşulmasıdır. Artıq bununla bağlı ölkənin “SWB” nəqliyyat şirkəti xəbərdarlıq yayıb.
