İlham Əliyev və xanımı Mehriban Əliyeva VI Qlobal Bakı Forumunun iştirakçılarının şərəfinə verilən ziyafətə gələrkən. Foto: president.az
Mərkəzi Seçki Komissiyası bu gün keçirilən növbədənkənar prezident seçkilərinin ilkin nəticələrini açıqlayıb. Komissiyanın məlumatına görə, 8 namizəd arasında ən çox səsi hazırkı prezident, Yeni Azərbaycan Partiyasından prezidentliyə namizəd İlham Əliyev toplayıb. O, 86.09 faiz səslə qalib gələrək növbəti 7 il müddətinə Azərbaycan prezidenti seçilib.
Seçkiyə qatılan digər namizədlərin topladıqları səs faizləri isə belədir:
Bütöv Azərbaycan Xalq Cəbhəsi Partiyasının namizədi Qüdrət Həsənquliyev – 3.4%
Öz təşəbbüsü ilə prezidentliyə namizəd Zahid Oruc – 3.07%
Azərbaycan Demokrat Partiyasının namizədi Sərdar Cəlaloğlu – 2.97%
Müasir Müsavat Partiyasının namizədi Hafiz Hacıyev – 1.51%
Azərbaycan Sosial Demokrat Partiyasının namizədi Araz Əlizadə – 1.4%
Milli Dirçəliş Hərəkatı Partiyasının namizədi Fərəc Quliyev – 1.18%
“Cəbhəçilərin təşəbbüs qrupunun” namizədi Razi Nurullayev – 0.74%
Rəsmi məlumata görə, seçici fəallığı 74.51% olub. 5 milyon 314 min 365 seçicidən 3 milyon 959 min 553 nəfəri səs verib.
Seçkiləri izləmək üçün 894 beynəlxalq, 58 min 175 yerli müşahidəçi akkreditə olunub.
ATƏT Parlament Assambleyası, ATƏT Demokratik Təsisatlar və İnsan Hüquqları Bürosu, Avropa Şurası Parlament Assambleyası, Müstəqil Dövlətlər Birliyi də daxil olmaqla 60 təşkilat, eləcə də 59 ölkədən beynəlxalq müşahidə missiyaları seçki prosesini izləyib.
Müşahidəçilərin əksəriyyəti seçkilərin gedişatını müsbət qiymətləndirib, pozuntu qeydə alınmadığını bildiriblər. Sosial şəbəkələrdə seçkidə bir seçicinin 1 dəfədən artıq səs verməsi, qutuya topa bülletenlərin atılması, bəzi müşahidəçilərin və jurnalistlərin seçkilərin gedişatını müşahidə etməsi, işıqlandırmasına maneələr yaradıldığı barədə məlumatlar, foto və videolar paylaşılıb.
MSK-nın sədr müavini Natiq Məmmədov bu hallarla bağlı açıqlamasında pozuntuların doğru məlumat olmadığını bildirib və qeyd edib ki, gün ərzində MSK-yə şikayət daxil olmayıb.
“Els” Müstəqil Araşdırmalar Mərkəzi, “RƏY” Monitorinq Mərkəzi, Vətəndaşların Əmək Hüquqlarını Müdafiə Liqası ABŞ-ın “Artur Finkelşteyn və Assosiasiya” şirkəti ilə birlikdə və Vətəndaş Cəmiyyəti uğrunda Müstəqil Məsləhət və Yardım Mərkəzi Fransanın “Opinion Way” təşkilatı ilə birlikdə prezident seçkilərində “exit-poll” keçirib. Onların hər birinin açıqladığı ilkin nəticələrdə İlham Əliyevin 80%-dən çox səs topladığı qeyd olunmuşdu.
