Jurnalist: Məntəqə yaxınlığında mülki geyimli polislər çəkilişə mane olur

Mərkəzi Seçki Komissiyasının sədri Məzahir Pənahov bu gün keçirilən prezident seçkilərinin gedişatı ilə bağlı danışıb və bildirib ki, hələ ki, qaynar xəttə şikayət daxil olmayıb. O bildirib ki, o bildirib ki, təşviqat prosesi lazımi səviyyədə aparıldığına görə seçicilər fəallıq göstərir. “Seçki prosesinin tam şəffaf aparıldığını həm də beynəlxalq müşahidəçilərin fikrinə əsasən demək olar. Onlar hamısı səsvermə prosesinin Seçki Məcəlləsinə uyğun olduğunu bildiriblər” – deyə MSK sədri bildirib.

Komissiya həmçinin seçicilərin saat 15:00-a olan fəallığı ilə bağlı da son məluamtları açıqlayıb. MSK Katibliyinin Seçkilər İnformasiya Mərkəzinin müdiri Fərid Orucov jurnalistlərə açıqlamasında deyib ki, indiyə qədər 3 milyon 227 min 817 nəfər seçici səs verib. Bununla da seçkidə ümumi seçicilərin 60.74%-i iştirak edib.

Pozuntu halları da qeydə alınmağa davam edir. D18 hərəkatının sədri Ruslan İzzətli seçkidə pozuntu müşahidə etdiyini yazıb. Onun sözlərinə görə 42 saylı Sumqayıt ikinci seçki dairəsində 21 saylı seçki məntəqəsində “karusel” əməliyyatı keçirilib. R.İzzətli deyir ki, “karusel”də iştirak edən seçicilər məntəqənin yaxınlığındakı mərasim zalına toplanır və oradan 5-6 nəfərlik qrup halında səsverməyə gətirilir.

21 saylı Nəsimi seçki dairəsi, 8 saylı məntəqədə çəkiliş aparmaq istəyən jurnalist Cəmil Hacıyevə məntəqə sədri mane olub. Jurnalist bildirib ki, onun vəsiqəsi olduğu halda məntəqə sədri səsvermənin gedişini izləməyə icazə verməyib. Həmçinin məntəqənin yaxınlığında mülki geyimli polislərin olduğunu deyən C.Hacıyev həmin şəxslərin çəkiliş aparmaq istəyənlər barədə hara isə məlumat ötürdüyünü əlavə edib.

“Biz zorla qaçıb yaxınlıqdakı binalardan birinin blokunda gizləndik ki, bizi aparmasınlar” – deyə C.Hacıyev bildirib.