Rusiya Parlamentinin aşağı palatası Duma ABŞ əleyhinə sanksiya nəzərdə tutan qanun layihəsi hazırlayır. Reuters xəbər verir ki, qida, alkoqol və dərman məmulatlarının daxil edildiyi qanun layihəsi bu məhsulların ABŞ-dan idxalını qadağan edir. Dumadan bildirilib ki, bu, ABŞ-ın ötən həftəki hərəkətinə cavabdır.
Lakin qanun layihəsinin olduğu kimi qəbul olunacağı, yoxsa düzəliş üçün Kremlə geri göndəriləcəyi hələlik dəqiq məlum deyil. Kremlin sözcüsü Dmitri Peskov deyib ki, Rusiya qanunverici orqanının Amerika əleyhinə belə addım atmaq istəməsi başa düşüləndir. O vurğulayıb ki, Kreml hələ ki, qanun layihəsi ilə tanış olmayıb.
Qanun layihəsi qəbul olunarsa, bu, ABŞ şirkətlərinə mənfi təsir edə bilər, amma eyni zamanda insanların “Mc Donald`s”a axın edib “Boeing” təyyarələri ilə səyahət etdiyi və “Apple” markalı telefonlar işlətdiyi Rusiyada da ciddi problemlər yarada bilər.
Layihədə qeyd olunur ki, onun hazırlanmasında məqsəd Rusiyanın təhlükəsizliyini və maraqlarını ABŞ-ın və digər xarici dövlətlərin dostyana olmayan və qeyri-qanuni hərəkətlərindən qorumaqdır.
Rəsmi statistikaya görə Rusiya 2017-ci ildə ABŞ-dan 12.5 milyard dollar dəyərində məhsul idxal edib. Bura təyyarə, maşın, əczaçılıq və kimyəvi məhsullar daxildir.
