Konstitusiya Məhkəməsinin sabah keçiriləcək Plenum iclasında prezident seçkilərinin yekun protokoluna baxılacaq. Azadlıq Radiosu xəbər verir ki, iclasda Mərkəzi Seçki Komissiyasının təqdim etdiyi sənədlər yoxlanacaq və seçkinin yekunları təsdiqlənəcək.
İclas saat 15:00-da baş tutacaq.
MSK aprelin 11-də keçirilən növbədənkənar prezident seçkilərinin yekun protokolunu ötən gün Konstitusiya Məhkəməsinə təqdim edib. Həmin protokola görə İlham Əliyev 86.02% səs toplayıb. Digər 7 namizədin topladığı səs faizləri isə 0.74%-dən 3.12%-ə qədərdir.
- ATƏT-in Demokratik Təsisatlar və İnsan Hüquqları Bürosunun (DTİHB) müşahidəçiləri, bu qurumun və Avropa Şurası parlament assambleyalarının nümayəndə heyətləri hesabatlarında seçkilərdə pozuntular qeydə aldıqlarını desələr də MSK bununla razılaşmır.
- Komissiya sədri Məzahir Pənahov isə ötən gün mətbuata açıqlamasında həmin qurumları Azərbaycan xalqına hörmət etməyə çağırıb.
- MSK sadəcə 4 məntəqədə seçkinin nəticələrini ləğv edib ki, bu da ümumi nəticələrə təsir etmir.
