Prezident seçkiləri hansı halda ləğv edilə bilər?

Müxalif qüvvələr hesab edir ki, 11 aprel prezident seçkiləri legitim deyil və ləğv olunmalıdır. ATƏT və digər beynəlxalq təşkilatlar da seçkilərdə pozuntu qeydə alıb. Amma onların bu pozuntuların seçkinin nəticəsinə necə təsir etməsi ilə bağlı heç bir fikri yoxdur.

Azərbaycanda Prezident seçkilərinin nəticələri necə ləğv oluna, ya da ertibarsız sayıla bilər?

Seçki Məcəlləsinə görə isə prezident seçkilərinin nəticələri iki halda etibarsız sayıla bilər.

Əgər seçki məntəqələrinin 5-də 2-indən çoxunun nəticəsi etibarsız sayılıbsa, ya da ləğv edilibsə. Bu da o halda ola bilər ki, həmin məntəqələrdəki seçici sayı ümumi seçici sayının 4-də 1-indən çox olsun.

İkinci halda isə seçki nəticəsi məhkəmə qərarı ilə ləğv oluna bilər. Hansı məhkəmə və necə?

Demokratik Təşəbbüslər İnstitutunun rəhbəri, seçki eksperti Akif Qurbanov: Bu məhkəmə qərarı Apelyasiya məhkəməsi də olar bilər, Ali məhkəmə də. Yəni seçkilərin nəticələrinə dair hər hansı pozuntular göstərilən səbəblər doğrultusunda məntəqələrin 2/5-sini əhatə edərsə, seçkilərin ləğvinə gətirib çıxara bilər. Konstitusiya məhkəməsi seçkilərin yekun protokolunu və digər müvafiq sənədləri araşdırarkən pozuntular aşkar edərsə, seçkilərin nəticələrinə ləğv edə bilər.

MSK isə hesab edir ki, heç bir qanun pozuntusu olmayıb, hətta seçki müddətində qaynar xəttə 1 dənə belə şikayət daxil olmayıb. Yəni hər şey qaydasındadır. Sosial şəbəkələrdəki qanun pozuntusu videoları isə tamamilə saxtadır.

Bəs seçkinin nəticəsindən şikayət emtək olarmı?

Qanun imkan verir ki, prezident seçkisinə qatılmış namizədlər ona dair şikayət etsinlər.Bu şikayət Mərkəzi Seçki Komissiyasının qərarından Apelyasiya Mhəkəməsinə, bu məhkəmənin qərarından da Ali Məhkəməyə verilə bilər.

Amma 11 aprel seçkilərindəki namizədlərin hamısı seçkinin gedişatı və nəticəsindən razı olduqlarını açıqlayıblar. Bu namizədlərin bəzisi elə həmin gün İlham Əliyevi qələbə münasibətilə təbrik edib. Hətta onların arasında İlham Əliyevə səs verdiyini açıqlayan da var. Bu da o deməkdir ki, nə MSK seçki nəticələrini ləğv edəcək, nə də ki, məğlub namizədlərdən kimsə məhkəməyə müraciət edəcək.