Türkiyə müxalifəti iki ay sonra keçirilməsi planlaşdırılan növbədənkənar prezident və parlament seçkilərinə qatılacaqlarını açıqlayıb.
NTV Türkiyə xəbər verir ki, İyi Parti sədri Meral Akşener açıqlamasında bildirib ki, dərhal seçkiyə hazırlığa başlayıblar.
“Mən 100 min imza ilə prezidentliyə namizəd olacam. İyi parti seçkidə iştirak edəcək və qalib gələcək. Böyük qardaşlar qorxub. Qorxduqlarını bilirdim, amma onun bu həddə olduğu ağlıma gəlməmişdi. Bu seçkidə bizim heç bir problemimiz yoxdur. Mən gözləyirdim ki, iyulun 15-də edəcəklər. Hansı qanunu çıxarırlarsa, çıxarsınıar, qorxunun əcələ faydası yoxdur. Ölkəmizə, millətimizə xeyirli olsun” – deyə partiya sədri vurğulayıb.
İyi Parti baş katibi və sözcüsü Aytun Çıray bildirib ki, heç bir qüvvə onların seçkidə iştirakına mane ola bilməz.
A.Çıray Dövlət Baxçalının növbədənkənar seçki təklifini “razılaşdırılmış döyüş” kimi dəyərləndirib.
“Bilirlər ki, 2019-cu il oktyabrın 3-də, öz vaxtında seçki keçirilsə dollar 7 türk lirəsi, avro 8,5, benzin 8,5 türk lirəsi olacaq və iqtisadiyyat uçuruma gedəcək”.
Cümhuriyyət Xalq Partiyasının sözcüsü Bülent Tezcan partiyasının seçkidə iştiraka hazır olduğunu açıqlayıb:
“Tək adamlıq koalisiyanın sözcüsü Dövlət Baxçalı təklif etdi ki, 26 avqustda növbədənkənar seçki keçirilsin. Koalisiyanın böyük ortağı isə 24 iyunda keçirilməsinə qərar verib. O qədər tələsik qərar veriblər ki, tarix ali məktəbə qəbul imtahanı ilə üst-üstə düşüb. İndi də imtahanların vaxtını dəyişəcəklər. Biz seçkiyə lap sabah da baş tutacaqmış kimi hazırıq” – deyə B.Tezcan vurğulayıb.
