Bu gün Avropa Məhkəməsi Azərbaycanla bağlı 2 qərarını elan edib.
Məlumatı vəkil Fariz Namazlı yayıb. Qərarlardan biri Ənnağı Hacıbəyli və İntiqam Əliyevin Vəkillər Kollegiyasına üzv qəbul edilə bilməməsi ilə bağlı verilən şikayətdir. Avropa Məhkəməsi Konvensiyanın 10-cu (ifadə azadlığı) maddəsinin pozulmasını, 6-cı (ədalətli məhkəmə araşdırılması hüququ) maddə üzrə araşdırmağa ehtiyac olmadığını, həmçinin hökümətin 34-cü maddə üzrə öhdəliklərini yerinə yetirmədiyi müəyyən edilib. 34-cü maddə üzrə pozuntu ona görə tanınıb ki, İntiqam Əliyev 2014-cü ilin avqust ayında həbs edilərkən onun ofisində Baş prokurorluğun əməkdaşları Avropa məhkəməsində olan işlər üzrə sənədləri aparıb. Məhkəmə hər bir ərizəçiyə mənəvi zərərə görə 7500 avro, Ənnağı Hacıbəyliyə isə məhkəmə məsrəflərinə görə 2500 avro ödənilməsinə qərar verib.
Fariz Namazlı yazır ki, 2-ci qərar Anar Məmmədlinin 2013-cü ilin 16 dekabrında tutulması, barəsində həbs qətimkan tədbirinin seçilməsi, həmin müddətin uzadılmasına dairdir. Avropa Məhkəməsi Konvensiyanın 5.1 və 5.4-cü (azadlıq hüququ) maddələrinin, həmçinin 18-ci maddəsinin (hüquqların siyasi məqsədlərə görə məhdudlaşdırılması) pozuntusunu tanıydı, 5.3-cü maddə üzrə şikayətin ayrıca araşdırılmasına ehtiyacın olmasını bildirdi. Məhkəmə mənəvi zərərə görə 20000 avro, məhkəmə məsrəflərinə görə 2500 avro kompensasiya müəyyən etdi.
