Siyasi Məhbusları Müdafiə Mərkəzinin (SMMM) üzvü, hüquq müdafiəçisi Taleh Xasməmmədova qarşı Cinayət Məcəlləsinin 315.2-ci maddəsi (Hakimiyyət nümayəndəsinə qarşı müqavimət göstərmə və ya zor tətbiq etmə) ilə cinayət işi açılıb.
Daxili İşlər Nazirliyinin Mətbuat Xidmətdən APA-ya bildirilib ki, bu gün saat 11 radələrində Göyçay Rayon Polis Şöbəsinin Dövlət Yol Polisi Bölməsinin əməkdaşları xidmətdə olarkən yol-hərəkət qaydasını pozan BMW markalı avtomobili saxlayıblar: “Yol polisinin əməkdaşı istifadəsində olan bort-kompyuterə nəqliyyat vasitəsinin məlumatlarını daxil edərkən onun barəsində həbs qərarının olması müəyyən edilib və avtomobili qanuna müvafiq qaydada duracağa yerləşdiriblər.
Bundan sonra avtomobilin sahibi, əvvəllər məhkum olunmuş Taleh Xasməmmədov DYPB-in rəisinin iş otağına gələrək dərhal avtomobilinin buraxılmasını tələb edib. Ona maşınının saxlanılmasının səbəbləri ətraflı izah edilib və bildirilib ki, cəriməni dəbbə pulu ilə birlikdə ödədikdən sonra nəqliyyat vasitəsini duracaqdan götürə bilər. Bununla razılaşmayan T. Xasməmmədov daha da aqressivləşərək xidməti otaqda öz xuliqanlıq hərəkətlərini davam etdirib, oradakı əşyaları dağıdaraq yararsız hala salıb. Onu sakitləşdirmək istəyən 3 polis əməkdaşına isə xəsarət yetirib ki, onlardan biri dərhal rayon xəstəxanasına yerləşdirilib. Buna baxmayaraq onun qanunsuz hərəkətlərinin qarşısı alınıb və saxlanılıb”.
Meydan TV hüququ müdafiəçisi Oqtay Gülalıyevə istinadən yazır ki, Göyçay Rayon Polis Şöbəsində polislər özlərinə xəsarət yetirərək, paqonlarını çırıblar. Taleh Xasməmmədova isə şöbədə fiziki zor tətbiq edərək, bu hərəkətin onun tərəfindən olduğuna dair ifadə almağa çalışırlar.
“Məqsəd onu həbs edib cəzalandırmaqdır. Çünki o, son zamanlar rayonda və ölkədə baş verən qanunsuzluqları, korrupsiya hallarını, məmur özbaşınalığını, seçki saxtakarlığını şiddətlə tənqid edənlərdəndir”. Oktay Gülalıyev belə deyib.
Əgər ittiham təsdiqini taparsa hüquq müdafiəçisini üç ildən yeddi ilədək müddətə azadlıqdan məhrumetmə cəzası gözləyir.
- T. Xasməmmədov 2011-ci ilin noyabrında da xuliqanlıq və polisə müqavimət maddələri ilə həbs edilib. Göyçay Rayon Məhkəməsi onun haqqında 4 il azadlıqdan məhrumetmə cəzası çıxarıb. Təxminən bir il sonra prezidentin əfv sərəncamı ilə azad edilib.
- İkinci dəfə 2015-ci ildə Cinayət Məcəlləsinin xuliqanlıq maddəsi ilə ittiham olunaraq 3 il azadlıqdan məhrum edilib, 2016-cı ilin martında əfv sərəncamı ilə azadlığa buraxılıb.
- Həmin vaxt beynəlxalq təşkilatlar Taleh Xasməmmədovu “vicdan məhbusu” elan edib.
