Şimali Koreya nüvə silahı testlərini dondurdu

Şimali Koreya lideri Kim Çen In nüvə silahı və qitələrarası ballistik raket testlərini dondurduğunu açıqlayıb. CNN xəbər verir ki, Şimali Koreya dövlət mediasının yaydığı məlumata görə, Kim Çen In artıq buna ehtiyac olmadığını bəyan edib.

ABŞ prezidenti Donald Trump buna Twitter sosial şəbəkəsində reaksiya verib və Kimin bu addımını müsbət qarşılayıb. Bu qərarın həm Şimali Koreya, həm də dünya üçün böyük irəliləyiş olduğunu vurğulayıb.

North Korea has agreed to suspend all Nuclear Tests and close up a major test site. This is very good news for North Korea and the World – big progress! Look forward to our Summit.

— Donald J. Trump (@realDonaldTrump) April 20, 2018

Şimali Koreyadan olan mənbə isə CNN-ə bildirib ki, Kim Çen In bu addımı ilə ölkəsi üçün yeni səhifə açmış olur. O, artıq ölkəsinin iqtisadi inkişafına fokuslanacaq.

Şimali Koreya sonuncu dəfə 6-cı nüvə testini sentyabrda reallaşdırıb. Bu, ən güclü nüvə silahı hesab olunan hidrogen bombası idi.

Bir həftə sonra Şimali və Cənubi Koreya liderlərinin demilitarizasiya zonasında görüşü olacaq.