Azərbaycan Respublikasının kənd təsərrüfatı naziri İnam Kərimov 2012-ci ildən bu günə qədər Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmət) sədri vəzifəsində çalışıb.
1977-ci il 6 iyunda Bakıda doğulan İnam Kərimov Humanitar fənlər Gimnaziyasında (1984-1994), ABŞ-ın İndiana ştatında Richmond High School-da (1994-1995) oxuyub.
1995-ci ildə Bakı Dövlət Universitetinin Beynəlxalq hüquq fakültəsinə qəbul olunan yeni nazir 1998-2000-ci illərdə Fransanın Strasburq Universitetində Hüquq üzrə bakalavr, 2000-2002-ci illərdə isə Sarbonna Universitetində hüquq üzrə magistr təhsili alıb.
O, kariyerasına 2002-ci ildə Prezidentinin Administrasiyasında məsləhətçi kimi çalışmaqla başlayıb. 2004-2012-ci illərdə isə İ.Kərimov baş məsləhətçi vəzifələrində çalışıb. 2005-2012-ci illərdə Azərbaycan Respublikasının Korrupsiyaya qarşı mübarizə üzrə Komissiyasının katibi olub.
Azərbaycan Respublikasının Prezidentinin 7 sentyabr 2012-ci il tarixli sərəncamı ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri təyin edilib.
İngilis, fransız, fars və rus dillərini bilir. Evlidir, iki övladı var.
Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin yeni sədri Rövşən Rzayev Milli Məclisin IV çağırış deputatı olub. 1962-ci il təvəllüdlü R.Rzayev “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin idarə heyətinin də üzvü olub.
Azərbaycan Respublikasının Dövlət Şəhərsalma və Arxitektura Komitəsinin sədri vəzifəsinə təyin edilən Samir Nuriyev 1975-ci il tarixində Bakı şəhərində anadan olub. 1991-ci ildə Azərbaycan Texniki Universitetinə daxil olaraq 1996-cı ildə həmin Universitetin Mühəndis biznesi və menecment fakültəsi mühəndis-iqtisadçı ixtisası üzrə fərqlənmə diplomu ilə bitirib.
2000-2001-ci illərdə BMT İnkişaf Proqramının Azərbaycan ofisində biznes-məsləhətçi vəzifəsində çalışıb.
2003-2005-ci illərdə təhsilini ABŞ-ın “Duke” Universitetində davam etdirərək Beynəlxalq İnkişaf Siyasəti üzrə magistr dərəcəsini əldə edib.
2006-cı ildə Azərbaycan Respublikasının İqtisadi İnkişaf Nazirliyində Sahibkarlığın inkişafı departamentinin direktoru vəzifəsində çalışıb.
2009-cu ildən Azərbaycan Respublikasının Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsinin rəis müavini, 2013-cü ildə isə həmin İdarənin rəisi olub.
İlham Əliyevin sərəncamı ilə 12 aprel 2016-cı ildən Azərbaycan Respublikasının Prezidenti yanında Mənzil İnşaatı Dövlət Agentliyinin direktoru vəzifəsində çalışıb.
14 fevral 2018-ci il-ci ildə Azərbaycan Respublikasının Mənzil İnşaatı Dövlət Agentliyinin İdarə Heyətinin sədri təyin edilib.
2015-ci ildən Azərbaycan Respublikası Memarlar İttifaqının fəxri üzvüdür.
“Yeni Azərbaycan” partiyasının üzvüdür. Evlidir, iki övladı var.
Azərbaycan Respublikasının əmək və əhalinin sosial müdafiəsi naziri Sahil Babayev bundan öncə iqtisadiyyat nazirinin müavini olub. Qaynar.info-nun məlumatına görə, 1980-ci ildə anadan olan S.Babayev Bakı Dövlət Universitetində “Beynəlxalq hüquq və beynəlxlaq münasibətlər” sahəsi üzrə bakalavr və magistr təhsili alıb. Hüquq üzrə fəlsəfə doktoru olan yeni nazir 2006-2009-cu illərdə Azərbaycan Respublikası Milli Məclisinin sədr müavininin köməkçisi vəzifəsində işləyib.
2009-cu ildən İqtisadi İnkişaf Nazirliyinin Xarici investisiyalar və yardımların əlaqələndirilməsi şöbəsinin müdiri, 2011-ci ildən isə Beynəlxalq təşkilatlarla əməkdaşlıq şöbəsinin müdiri vəzifəsində işləyib.
Prezidentin 2014-cü ildə imzaladığı sərəncama əsasən S.Babayev Respublikası iqtisadiyyat və sənaye nazirinin müavini, 2016-cı il yanvarın 30-da imzalanan sərəncamla isə Respublikasının iqtisadiyyat nazirinin müavini vəzifəsinə təyin edilib.
