“Rəsmi Bakı 2017-ci ildə də dini azadlıqlara münasibətdə özünü sərt mövqeyini dəyişdirməyib. Hakimiyyət dini fəaliyyətlərə müvafiq qanunlar və Cinayət Məcəlləsinin köməyi ilə tam nəzarət edir”.
ABŞ-ın Beynəlxalq Din Azadlığı Komissiyası 2018-ci il üçün növbəti illik hesabatının Azərbaycanla bağlı hissəsində belə yazılıb.
Hesabatda 16 ölkə “xüsusi narahatlıq doğuran ölkələr” kateqoriyasına daxil edilib və 2017-ci ildə 28 ölkədə dini azadlıqlar sahəsində baş vermiş tərəqqi və pozuntular sənədləşdirilib.
Foto: screenshot
Turan yazır ki, hesabatda protestantlara, Yəhvanın şahidləri təriqətinə və bəzi müsəlman qruplara qarşı polis reydlərinin davam etidiyi vurğulanır.
Dövlətin diqtə etdiyi qaydalara uyğun gəlməyən müsəlman liderlər saxlanır, cərimələnir və onların məscidləri dağıdılır.
Hesabatda həmçinin 2015-ci il Nardaran hadisələri, bunun nəticəsində Müsəlman Birliyi Hərəkatı üzvlərinin 12 nəfərinin müxtəlif ittihamlarla 12 ildən 17 ilədək azadlıqdan məhrum edilməsi yer alıb.
Mövcud qanunların hökumətə dindarlara münasibətdə “tam və hüdudsuz səlahiyyətlər” verdiyi qeyd edilən hesabatda müsəlman təşkilatların, başqa dinlərə aid qruplardan daha çox məhdudiyyətlərlə üzləşdiyi qeyd edilib.
Ölkədə 160 siyasi məhbusdan 90-100-nün dini fəaliyyətinə görə həbs edildiyi də yazılıb.
