Azərbaycanın AŞPA-dakı nümayəndə heyətinin keçmiş üzvü, keçmiş deputat, Milli Şuranın Koordinasiya Mərkəzinin üzvü Gültəkin Hacıbəyli fəaliyyəti dövründə də bəzi avropalı deputatlara hədiyyələr verildiyini deyib. Azadlıq Radiosunun xəbərinə görə, keçmiş deputat bildirib ki, deputatlara əsasən kürü, süvenirlər və s. bu kimi hədiyyələr verilib:
“Mən özüm də Avropadakı dostlarıma iki qutu kürü aparmışam. Lobbiçilik fəaliyyəti məqsədilə. Leqal şəkildə bəzi addımlar atılırdı. Açığı, o zaman belə ciddi şəkildə korrupsiyanın şahidi olmamışam. Əslində, buna zərurət də yox idi. 2009-cu ilə qədər Avropa Şurası ilə Azərbaycan arasında normal əməkdaşlıq var idi. Problemlər daha çox 2009-cu ildən sonra yaranmağa başladı. Azərbaycana neft gəlirləri gəldi, varlandı. Bundan sonra hakimiyyət bu fikrə düşdü ki, avropalı deputatları da ələ alsın, məruzəçiləri öz istəyi ilə təyin etsin. O zaman Kristof Ştrasserin Azərbaycanda siyasi məhbuslarla bağlı qətnaməsini əngəlləmək məqsədilə geniş kampaniya başladıldı. Həmin qətnamənin qəbul olunmaması üçün avropalı deputatlar pul, müxtəlif hədiyyələr və başqa vasitələrlə ələ alındılar”.
Foto: Screenshot
G.Hacıbəyli vurğulayıb ki, Avropa Şurasının korrupsiya ilə bağlı hesabatı hərtərəfli və əsaslı hazırlanıb:
“Araşdırmanı aparanlar təcrübəli hüquqşünaslardır. Onlar Avropa Məhkəməsinin hakimi olublar, biri İsveçin ombudsmanı olub. Avropa məkanında nüfuzlu, peşəkar, təcrübəli hüquqşünas kimi tanınırlar. Bu şəxslər bir ilə yaxın müddətdə ciddi araşdırma aparıblarsa, ortaya konkret faktlar qoyublarsa, təbii ki, bizim buna inanmamaq üçün əsasımız yoxdur”.
Keçmiş deputat deyir ki, hakimiyyət indiyədək o araşdırmada deyilənləri təkzib edən heç bir ciddi fakt təqdim etməyib.
Cəza mexanizmindən danışan Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli bu mexanizmlərin qarışıq olduğunu və eləcə də qurumun tarixində ilk dəfə bu cür araşdırma aparan qrupun yaradıldığını deyib:
“Mexanizmlər də qeyri-müəyyəndir. Azərbaycanın Avropa Şurasından uzaqlaşdırılacağını gözləmirəm. Sadəcə, ayrı-ayrı şəxslərin, xüsusən də Azərbaycan nümayəndə heyətindəki bəzi şəxslərin qurumda qalması məsələsinə baxıla bilər. Xatırladım ki, ilk gündən bu qalmaqalda adı çəkilən azərbaycanlı deputatlar Müslüm Məmmədov, Elxan Süleymanov artıq AŞPA-nın nümayəndə heyətində başqaları ilə əvəzləniblər. Başqalarının qurumda qalmasına baxıla bilərmi? Çətinlik çəkirəm cavab verməyə. Proseslərin gedişini izləyək”.
