Avropadakı iki siyasi fəalın Azərbaycandakı qohumları həbs edilib

Hollandiyada yaşayan siyasi fəal Orduxan Teymurxanın bacısı oğlu Tural Əliyev və digər siyasi fəal Rəşad Qurbanovun qardaşı saxlanılıb.

Hər ik isiyasi fəal ailə üzvlərinin həbsinin onların siyasi fəaliyyəti ilə bağlı olduğunu iddia edir.
Bu barədə öz şəxsi Facebook profilində məlumat verən O.Teymurxan bildirib ki, 19 yaşlı Tural Əliyev Bakı Dövlət Universitetinin kimya fakültəsində oxuyur.

“Yoldan zorla aparılıb. Deyirlər, 2 ay müddətinə həbs ediblər. Hansı maddə ilə həbs olunduğu bilinmir” – deyə siyasi fəal bildirib.

Turan İnformasiya Agentliyinin yaydığı məlumata görə, Rəşad Qurbanovun qardaşı Fuad Qurbanov isə Mingəçevir şəhərində həbs olunub. Onun polis idarəsində döyüldüyü və kamera qarşısında öz qardaşını təhqir etməyi tələb olunduğu bildirilir.

“Son məlumatlara görə, qardaşımı 30 sutka həbs ediblər və Gəncəyə etap ediblər” – deyə R.Qurbanov məlumat verib.

Bu, siyasi fəalların ailə üzvlərinin ilk həbsi deyil. Belə ki, Orduxan Teymurxanın bu ilin fevral ayında da Bakıda yaşayan yaxın qohumları Səbuhi Zeynalov və Tural Əliyevin hər birinə 30 sutka inzibati həbs cəzası verilib.
Ötən ilin əvvəllərində onun 12 nəfər qohumu polis bölməsinə aparıldığı və təzyiqlərə məruz qoyulduğu bildirilib.

Martın 8-də isə R.Qurbanovun qaynı İlkin Quliyev Şəkidə saxlanılıb. O, polisə tabe olmamaq ittihamı ilə 30 sutka inzibati həbs cəzası alıb.

R.Qurbanov bildirib ki, martın 2-də Fransada Azərbaycan səfirliyinin qarşısında etiraz aksiyasında iştirak etdikdən sonra ona qarşı təzyiqlər başlayıb.