Gözəl Bayramlıdan əfv ərizəsi yazması tələb edilir AXCP sədrinin müavini Gözəl Bayramlıya Kürdəxanı İstintaq Təcridxanasında təzyiq edildiyi bildirilir. Bu haqda partiya rəhbərliyi və onun qohumları məlumat yayıb. AzadlıqRadiosu yazır ki, aprelin 28-də Gəncə İstintaq Təcridxanasından 1 saylı Bakı İstintaq Təcridxanasına köçürülən G.Bayramlıdan prezidentə əfv ərizəsi yazmaq tələb edilib. Tələbi rədd edən Gözəl Bayramlını Kürdəxanıda 10 saat soyuq yerdə ac-susuz saxlayıblar. Sonra 4 saylı Cəzaçəkmə Müəssisəsinə göndəriblər. Gözəl Bayramlı özü isə mübarizə əzminin möhkəm olduğunu, heç bir təzyiqin onu yolundan döndərə bilməyəcəyini söyləyib. Penitensiar Xidmətin İctimaiyyətlə əlaqələr şöbəsinin rəisi Mehman Sadıqov təzyiqlə bağlı yayılan məlumatı təkzib edib.
Kabildəki partlayışda 8 jurnalist ölüb Əfqanıstanın paytaxtı Kabildə 29 nəfərin ölümü ilə nəticələnən partlayışda ölənlərin 8-i jurnalistdir. CNN xəbər verir ki, operator kimi geyinən terrorist iki partlayış törədib və jurnalistlər də ikinci partlayış zamanı həlak olub. İŞİD-in törətdiyindən şübhə edilən hadisə ABŞ səfirliyi və Əfqanınstan hökumət binalarının yerləşdiyi ərazidə, yerli vaxtla səhər saat 8-də baş verib. Ölən jurnalistlərdən biri Frans Press Agentliyinin 15 ildir Əfqanıstanda çalışan fotoqrafı Şah Maraydır, digərləri isə Azadlıq Radiosu`nun əməkdaşları Sabvun Kakar, Hananzai və Moharram Duranidir.
Türkiyədə prezidentliyə namizədlik üçün müraciətlər sabah başlayır Türkiyədə növbədənkənar prezident və parlament seçkilərinə qatılmaq istəyənlər sabahdan namizədlik üçün müraciət edə biləcəklər. Türkiyə Ali seçki Şurasının seçki təqvim planına görə, prezidentliyə namizədlər 5 may saat 17:00-a qədər, seçicilər tərəfindən namizədliyi irəli sürülənlər isə 2 may saat 17:00-a qədər şuraya müraciət edə bilər. NTV Türkiyə xəbər verir ki, bu həftə ərzində siyasi partiyaların prezidentlik üçün kimləri namizəd göstərdiyi bəlli olacaq. Seçicilər tərəfindən namizədliyi irəli sürülənlər tələb olunan 100 min imzanı 4-9 may tarixlərində toplamalıdır. Namizədlərin dəqiqləşdirilmiş rəsmi siyahısı 13 mayda dərc olunacaq və bundan sonra təşviqat kampaniyası başlayacaq.
