Deputatların yenə maaşlarının artırılması təklif olunur – gündəlik xəbərlər – 02.05.2018

Britaniya ofşor ərazilərdəki şirkət sahiblərinin adlarını açıqlayacaq

Britaniya hökuməti mayın 1-də Kayman və Vircin adalarındakı şirkətlərin sahibləri üzərindən məxfiliyin qaldırılmasına razılaşıb. Bu addım korrupsiya və vergidən yayınma hallarının qarşısını almaq məqsədi daşıyır. Hökumət bunu 2020-ci ilin sonunadək həyata keçirməyi planlaşdırır.
Britaniya Vircin Adalarının (BVA) hökumət başçısı Orlando Smit isə bu xəbərə görə narahat olub və şəffaflıq siyasətinin qüsurlu olduğunu hesab edir.
Bu dəyişikliklərə görə, ofşor ərazilərdəki şirkətlərin əsl sahiblərinin adlarından ibarət mərkəzi reyestr jurnalistlər və ictimaiyyət üçün açıq olmalıdır.
Müxtəlif vaxtlarda aparılan jurnalist araşdırmalarından sonra məlum olub ki, Britaniyada prezident İlham Əliyevin ailəsinin də milyonlarla dollarlıq mülkləri var.

Deputatların yenə maaşlarının artırılması təklif olunur

Ombudsmanın, Konstitutsiya məhkəməsi hakimlərinin, məhkəmə hakimlərinin və deputatların maaşlarının artırılması təklif olunur. Bu təklif adı çəkilənlərin statusu ilə bağlı qanuna dəyişikliklərdə qeyd olunub.
Milli Məclisin mayın 4-də keçiriləcək iclasının gündəliyinə salınan layihədə təklif olunur ki, onların maaşları 10 faiz artırılsın.
Hazırda isə Ombudsman 2025 manat, Konstitusiya məhkəməsi hakimləri 1802 manat, deputatlar isə 1575 manat maaş alır.

Nikol Paşinyan söz verdiyi kimi Yerevanı bloklayıb

Ermənistanda müxalif Yelk Partiyasının sədri Nikol Paşinyanın baş nazir seçilməməsindən sonra yenidən aksiyalar başlayıb. Kütləvi etiraz aksiyalarına metropoliten işçiləri də qoşulub və Yerevan metrosunun bütün stansiyaları bağlanıb. Hava limanına gedən yol, bəzi nazirliklərin girişi, bir çox küçə və prospektlər bağlanıb.
Ermənistanın İran və Gürcüstanla sərhədi də bağlanıb.
Aksiyalara liderlik edən Nikol Paşinyan isə təslim olmayacaqlarını və vətəndaş itaətsizliyinə davam edəcklərini açıqlayıb.