Malaziyada keçirilən parlament seçkilərində müxalifətin 92 yaşlı vahid namizədi, keçmiş Baş nazir Mahathir Məhəmməd qalib gəlib.
NTV Türkiyə xəbər verir ki, əvvəllər 22 il Baş nazir kimi çalışan M.Məhəmməd 2016-cı ildə hakim partiyadan istefa verib. Bu dəfəki seçkilərdə isə o, “Xalqın ümidi” blokunun namizədi olub və blok parlamentdəki 222 yerdən 122-ni qazanıb.
Bununla da ölkədə 61 ildən sonra ilk dəfə olaraq hakimiyyət dəyişib və adı korrupsiya ittihamlarında hallanan hazırkı baş nazir Nəcib Rezakın liderlik etdiyi Birləşmiş Malaziya Milli Partiyasının parlamentdə qazandığı mandatın sayı 79-a enib.
Yeni seçilən baş nazir Mahathir jurnalistlərə açıqlamasında deyib ki, intiqam almağa çalışmırlar: “İstəyimiz odur ki, hüququn aliliyini yenidən bərqərar edək”.
Birləşmiş Malaziya Milli Partiyasının liderlik etdiyi Milli Cəbhə ölkə İngiltərədən müstəqil olandan etibarən, 1957-ci ildən bəri ölkəni idarə edirdi.
2015-ci ildə ortaya çıxan korrupsiya ittihamlarına görə, Nəcib Rəzak dövlət büdcəsindən 700 milyon dollar pul mənimsəyib. Baş nazir iddiaları rədd etsə də yeni vəzifə təyinatları və dəyişikliklər etməklə iddialarla bağlı istintaqın aparılmasına mane olub.
Bundan sonra 2016-cı ildə Milli Cəbhədən ayrıldığını deyib.
