Ermənistanın yeni seçilən baş naziri Nikol Paşinyan Şuşanın işğalının il dönümü günü Dağlıq Qarabağa səfər edib. Səfəri zamanı münqaişənin həllindən də danışan Paşinyan əvvəlki açıqlamalarında olduğu kimi danışıqlar prosesində “Dağlıq Qarabağ Respublikası”nın da tərəf kimi iştirakını təklif edib.
Eyni zamanda həmin səfərdən sonra Azərbaycan mediasında Paşinyanın Azərbaycan xalqının qorxaq olduğu barədə bəyantla çıxış etməsi xəbəri yayılıb. Bu dezinformasiyaya Azərbaycan rəsmiləri də münasibət bildirib.
Mövzu ilə bağlı Azərbaycan Xarici İşlər Nazirliyinin sözcüsü Hikmət Hacıyev “Amerikanın səsi”nə müsahibə verib. Müsahibədən bəzi çıxarışları təqdim edirik.
Ermənistanın yeni baş naziri ilk addım kimi Ermənistan əhalisinin çoxdan ehtiyac duyduğu iqtisadi-sosial islahatlara başlamaq, xalqın problemlərini həll etmək əvəzinə Dağlıq Qarabağ mövzusuna müraciət edərək yenə də siyasi demoqoqiya, siyasi agitasiyaya üstünlük verir.
Paşinyan Ermənistan əhalisinin həyatında müsbətə doğru dəyişiklik etmək istəyirsə ilk növbədə münaqişənin həlli prosesindən başlamalıdır. Ona görə də danışıqlar prosesində velosiped kəşf etməyə və yaxud hər hansı bir əsassız yeniliklər axtarmağa ehtiyac yoxdur.
Paşinyanın Azərbaycanın işğal edilmiş ərazilərinə səfər etməsi, o cümlədən də Azərbaycanın işğal olunmuş tarixi Şuşa şəhərinə getməsi və orada münaqişənin mahiyyətini təkzib və təhrif edən müxtəlif açılamalarla çıxış etməsi, heç bir halda danışıqlar prosesinin ruhuna və prinsiplərinə uyğun deyil.
Proseslər də onu göstərir ki, Paşinyan daha çox Qarabağ ritorikasına üstünlük verməklə ictimai rəyi bir qədər öz maraqlarına uyğun yönəltməyə və manipulyasiya etməyə çalışır. Paşinyanı hakimiyyətə gətirən küçə indi onun özündən iş, yaxşı həyat şəraiti, maddi vəziyyətin düzəlməsi kimi şərtləri tələb edir.
