Media eksperti deyir ki, İTV direktorunun seçilməsi qanunun tələbinə uyğun aparılmayıb

İctimai Televiziya və Radio Yayımları şirkətinin baş direktoru Cəmil Quliyevin səlahiyyətlərinə ötən gün xitam verilib. Səhhətinə görə tutduğu vəzifədən ayrılmaq istəyən Cəmil Quliyevin yerinə İTV Yayım Şurasının iclasında Balakişi Qasımov seçilib.

Media eksperti Ələsgər Məmmədli isə deyir ki, direktor seçimi prosesində qanun pozuntusu olub. Ekspertin Facebook hesabında yazdığına görə, İctimai Televiziya və Radio Yayımları haqqında qanun tələb edir ki, direktor vəzifəsinə iddialı və bu sahədə təcrübəsi olan şəxslər 10 gün ərzində namizədliklərini irəli sürməlidirlər. Bundan sonra da Yayım Şurasının ən azı 6 üzvünün səs verdiyi namizəd direktor vəzifəsini icra edə bilər.

https://www.facebook.com/elesger/posts/10156338141949738

Ekspert xatırladır ki, 2013-cü ildə direktor vəzifəsinə seçkilər zamanı Emin Hüseynov da namizəd olub və seçki prosesindən narazı qaldığı üçün məhkəməyə müraciət edib.

Qanunvericiliyə görə İTV direktoru vəzifəsinə seçki 4 ildən bir keçirilir. Cəmil Quliyev bu vəzifəyə 2017-ci ildə ikinci dəfə seçilib, amma ekspertin sözlərinə görə, o, vəzifəsindən vaxtından tez getsə belə prosedur qanunvericilikdə göstərildiyi kimi aparılmalıdır.