Bu gün bir qrup məcburi köçkün Qaçqınlarla və Məcburi Köçkünlərlə İş üzrə Dövlət Komitəsinin qarşısında etiraz aksiyası keçiriblər. Həm Bakı, həm də ölkənin müxtəlif regionlarından olan məcburi köçkünlərin bir qismi ev problemindən, digər qismi də müavinət ala bilməməkən şiakyət edib.
Komitənin yeni sədri Rövşən Rzayevin qəbuluna düşmək istəyən etirazçılar deyib ki, qəbul günləri cəmi ayda 1 dəfə, hər ayın 15-də olur.
“Əvvəlcə növbəliliyi təmin etmək üçün siyahı hazırladılar, sonra həmin siyahını bir yana atdılar ki, qaçqın kartları ilə gəlin. Ona görə də burada qarışıqlıq düşdü”, – köçkünlərdən biri Azadlıq Radiosuna deyib.
Köçkünlərin sözlərinə görə, onlara 22 manat “çörəkpulu” nəzərdə tutulur. Üstəlik, kommunal xidmətlərə görə 36 manat ayrılıb. Bu il bu məbləğ 10 faiz artıb, 40 manata yaxınlaşıb.
Komitənin mətbuat xidmətinin rəhbəri İbrahim Mirzəyev aksiya köçkünlərin qarşısına çıxaraq onların şikayətlərini dinləyib. O əlavə edib ki, bu vəziyyət aradan qaldırılacaq. “Daha qəbul ayda bir dəfə yox, ayda dörd dəfə olacaq”, – deyə vurğulayıb.
