Bakının Bayıl qəsəbəsində yenidən sürüşmə qeydə alınıb. Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Şahmirzə Səfərov deyib ki, Səbail rayonu, Bayıl yaşayış sahəsi, Buxta küçəsində baş verən sürüşmənin səbəbi təbii amillər yox, texnogen səbəblərdir.
Onun sözlərinə görə, Ərazi yüksək mailli yamacda yerləşir və yamacın təbii meyilliyi 35-40 dərəcədir.
“Həmin yamac pilləli şəkildə kəsilib, tökmə torpaq üzərində pərakəndə şəkildə evlər tikilib. Nəticədə də yamac yüklənib, dayanıqlığı zəifləyib, kommunikasiya xətlərindən sular sızıb, torpaq qatının yuyulması prosesi gedib və bu səbəbdən aşınma və çökmə hadisəsi baş verib. Ümumiyyətlə bu ərazi sürüşmə, uçqun, yuyulma və çökmə kimi ekzogen proseslərin təsirinə məruz qalan bir sahə hesab olunur” – deyə nazirlik rəsmisi bildirib.
Nazirliyin yaydığı məlumatda qeyd olunur ki, hazırda mütəxəssislər müvafiq qurumlarla birgə ərazidə tədqiqat işləri aparır və təhlükəli sahənin sərhədləri müəyyənləşdirilir.
Azadlıq Radiosu xəbər verir ki, sürüşmə nəticəsində 3 ev uçub və 22 evin sakinləri (55 nəfər) ərazidən köçürülüb. Səbail rayon İcra Hakimiyyətindən verilən məlumata görə, həmin ərazidəki yaşayış evləri XX əsrin 50-ci illərində tikilib:
“Əksəriyyəti birmərtəbəli, möhkəm təməli olmayan, uzun illər istismar olunduğundan resursları tükənmiş evlərdir. Evlərin böyük əksəriyyəti Səbail Mənzil Kommunal Təsərrüfatı Birliyinin balansındadır”.
Bayıl qəsəbəsində əvvəllər də sürüşmə qeydə alınıb. Bundan öncəki sürüşmədə 4 ev tamam dağılıb və 100-ə yaxın ailə ərazidən köçürülüb. Həmin ailələrə kirayə pulları verildiyi bildirilir.
Ancaq həm icra hakimiyyətindən, həm da sakinlərdən verilən məlumata görə, evi uçan 4 ailədən başqa, qalan ailələrlə kompensasiyaların verilməsi ilə bağlı danışıqlar nəticə verməyib. Sakinlər kompensasiyanın azlığından şikayət edirdilər. Rəsmilər isə bildirib ki, həmin evlərin sənədləri qaydasında deyil.
