Azərbaycan Mərkəzi Bankı bu gün yeni 200 manatlıq pul nişanının təqdimat mərasimini keçirib. Mərasimdə həmçinin Azərbaycan Xalq Cümhuriyyətinin 100 illik, eks prezident Heydər Əliyevin isə 95 illik yubileyi münasibəti ilə hazlanan xatirə pul nişanlarının da təqdimatı olub.
Mərkəzi Bankın İdarə Heyətinin sədri Elman Rüstəmov 200 manatlıq əskinasın tədavülə buraxılmasının səbəbini belə izah edib:
“Son dekadada ölkə iqtisadiyyatının dinamik inkişafını, dövriyyədə olan nağd pulun strukturunda baş verən dəyişiklikləri nəzərə alaraq, eləcə də nağd pul sferasında səmərəliliyin yüksəldilməsinin təmin edilməsi məqsədilə yeni 200 manatlıq pul nişanının tədavülə buraxılması barədə qərar qəbul edilib”.
Yeni pul nişanının dizaynı müsabiqədə qalib gələn ABŞ şirkəti “Crane Currency”ə məxsusdur və o, “Giesecke+Devrient” şirkətində istehsal olunub.
Heydər Əliyevin anadan olmasının 95 illiyinə həsr olunmuş xatirə pul nişanı çəkisi 1 troy unsiyası (31.1 qram) olan yüksək əyarlı qızıldan və platin-qızıl kombinasiyasından ibarətdir.
Cümhuriyyətin yaradılmasının 100 ilik yubileyinə hər olunmuş xatirə pul nişanları çəkisi 1 , ¾ və ½ troy unsiyası olan yüksək əyarlı qızıldan ibarətdir.
Hər iki yubiley pul nişanları Böyük Britaniyanın “The Royal Mint” Kral Sikkəxanasında istehsal edilib.
